DiliPost.com – Planu Ministeriu Interior (MI) sei hari’i Postu Polisia Nasional Timor-Leste (PNTL) integradu 7 iha Rejiaun Espesiál Oekusse Ambeno (RAEOA).
“Ami iha ona planu atu harii postu PNTL integradu 7 inklui hari Postu ba Unidade Patrolamentu Fronteira ida iha mota Noel ekat Sub-regiaun Oe-silo Rejiaun Oe-cusse,” lia hirak ne’e hato’o husi Ministru Interior Francisco Da Costa Gutteres, bainhira partispa programa Meet the press ho topiku Konseitu segunransa interna ne’ebe realiza husi sekretariu Estadu Komunikasaun Sosial iha palasiu Governu Sesta feira ne’e.
Nia hatutan sira tenke monta tan postu ida iha fatin balun tan atu bele ajuda.
Nia fo ezemplu hanesan iha Noel Ekat ne’e atu monta postu ida iha ne’eba, hodi bele haree fali tanba susar atu kontrola.
“Ami tenke monta tan postu hitu atu haree problema sira ne’e hotu,” informa Ministru Francisco.
Governante ne’e dehan agora iha area balun hanesan mahata Oe-cusse kontrola susar itoan. Tanba, postu ida ba postu ida ne’e dook, area sira ne’ebe balun mamuk hela hanesan iha mota Noel ekat ne’e mota mak hafahe de’it, dadersan nia haksoik tama ba indonesia depois tun tia mota laran ne’e atu halo nusa.
“Ita husu dehan nia foin husi mota ne’e ba karau ka fase rupa ne’e lori masa bar-barak ita hanoin be’e.Maibe,laiha lori mina mak sae ba ne’e, ne’e hotu liga hotu ho postu liga fatubasin ho oe-silo mais distansia dook la halimar,”haktuir Francisco.
Nia dehan tan iha fatin balun Unidade Patrolamentu Fronteira ( UPF)sira la’o duni hanesan postu UPF kruz mai to’o postu UPF Pasabe ne’e, nune’e iha kruzamentu barak no fasil komunidade sira hatama sasan ilegal.
“ Distansia ne’e importante tebes duni, tanba iha fatin balun sira tenke la’o dook duni, por ezemplu ita boot sira hanoin iha kruz mai iha pasabe ne’e tenke la’o distansia ne’e dook, iha area sira ne’e iha Kruzamentu barak tama sai ne’e barak hela,” tenik MI ne’e.
Tan ne’e, nia dehan durante loron 15 iha ne’eba, orienta kedas ekipa halo levantementu kona-ba dadus ba estrada, nune’e kolia hela ho Obras Publikas no sira preparadu hela atu loke estrada liga postu ho postu ida. (Donny)
