Dílipost.com, Loron 09 Maiu 2026 – Prezidente Repúblika no Laureadu Nobel ba Paz, José Ramos-Horta, fó responde urjente ba kondisaun moris susar ne’ebé enfrenta husi idozu António Mira Belo ho nia oan feto Felisberta Pereira Belo, ne’ebé hela iha Aldeia Wai-Tunau, Suku Uma Ana Iku, Postu Administrativu Venilale, Munisípiu Baucau.
António Mira Belo, ne’ebé ho idade liu tinan 80, sofre difisiénsia iha ain, problema iha tilun no matan, ne’ebé halo nia labele la’o mesak. Kondisaun saúde ne’e halo nia ho nia oan feto moris iha difikuldade bo’ot, tanba la iha uma dignu no seguru atu proteje sira husi tempu udan no anin bo’ot.
Hafoin publikasaun kona-ba situasaun família ne’e iha media (RTTL.ep no STL News) Prezidente Ramos-Horta hatudu nia solidariedade imediata no preokupasaun ba nia povu.
Nune’e nia orienta ekipa asesoria Prezidénsia nian ba visita, hodi halo observasaun direta iha terenu no fó apoiu emerjénsia ba família refere.
Durante vizita ne’e, ekipa Prezidénsia entrega ajuda nesesidade bázika hanesan fós, mina tein, faru-manas no apoiu osan cash hamutuk U$100, ne’ebé mai husi Prezidente nia bolsu rasik, hanesan forma ida husi solidariedade no humanidade ba família ne’ebé enfrenta moris difisil.
Xefe Aldeia Wai-Tunau, Ponciano Domingos da Conceição Belo, apresia ho atensaun no apoiu husi Prezidente Ramos-Horta nian.
Nia dehan katak autoridade lokál sira sei kontinua servisu hamutuk ho Xefe Suku atu prepara proposta ida ba Prezidente hodi buka solusaun ne’ebé di’ak liu ba família no komunidade sira ne’ebé presija ajuda.
“Ami sei servisu hamutuk ho Xefe Suku nune’e prepara proposta ida ba Nai Prezidente atu bele ajuda ita nia povu, tanba ita hotu simu knár ida, Povu mak fó fiar ba ami atu servi povu hahu husi Delegadu/a, Xefe Aldeia, Xefe Suku to’o ba Nai Prezidente. Ita hotu servi ba povu,” dehan Ponciano Domingos da Conceição Belo.
Asaun ida-ne’e reflete kompromisu husi Prezidente Ramos-Horta nian atu kontinua hakbesik-an ba povu no responde lalais ba difikuldade sosiál ne’ebé afeta ba komunidade Kbi’it-naton sira.
Jornalista : Anita Silva
