Dilipost.com, Loron 31 Dezembro 2025– Komfrontu entre grupu jovens iha Suku Manutasi no soro, Munisípiu Ainaro, rezulta membru PNTL na’in-rua kanek no jovem ida hetan tiru iha ain tohar, tuir informasaun ne’ebé asessu husi Dilipost.com.
Membru PNTL na’in-rua ne’ebé kanek refere hanesan Xefi Investigador PNTL Ainaro ida no membru PNTL ida seluk, ne’ebé sofre pankada iha ulun tanba hetan tuda husi jovens sira, hafoin akontese komfrontu iha Kuarta-feira, loron 31 fulan Dezembru.
PNTL na’in-rua ne’e kanek bainhira sira halo atuasaun hodi rezolve problema komfrontu entre jovens sira iha suku refere. Iha tempu ne’ebá, PNTL mos konsege kaptura ona jovens balun maibé sei buka tuir suspeitu ne’ebé envolve direitamente iha konfrontu ne’e.
Informasaun mos hateten katak iha momentu komfrontu ne’ebé, PNTL lansa tiru, ne’ebé rezulta jovem ida hetan tiru iha ain tohar.
Atualmente, Ekipa Forsa Tarefas Konjunta, ne’ebé kompostu husi Polísia Nasionál Timor-Leste (PNTL) no FALINTIL–Forsa Defeza Timor-Leste (F-FDTL), iha ona terenu hodi hakalma situasaun no kontinua buka autores sira ne’ebé seidauk kaptura.
Rekorda katak antes ne’e Governu forma ona Ekipa Forsa Tarefas Konjunta PNTL no F-FDTL hodi garante seguransa sidadaun sira durante períodu Festa Natal no Tinan Foun 2026.
Nune’e, Polísia Nasionál Timor-Leste apela ba sidadaun hotu atu mantén pas no ordén públika, no afirma katak sei la tolera aktus violénsia husi jovens sira durante períodu festívus Natal no Tinan Foun.
Jornalista : Ekipa Dilipost
