Dílipost.com, Loron 02 Abríl 2026 — Primeiru-Ministru Kay Rala Xanana Gusmão dezeja felíz Páskua bá povu iha territóriu nasionál no iha diáspora.
Apelu ne’e fó-sai hafoin reuniaun semanál ho Prezidente Repúblika, José Ramos-Horta, iha Palásiu Prezidensiál Nicolau Lobato, Bairru-Pité.
Xefe Governu husu bá populasaun en-jerál, liu-liu juventude sira, atu mantein páz no estabilidade durante festa Páskua, hodi lori hakmatek ba sosiedade. Nia mós husu bá joven sira atu hasees-an hosi violénsia, tanba Páskua fó lembra kona-bá susar no sakrifísiu ne’ebé liga ho Jesus Kristu.
Iha períodu Páskua ne’e, PM Xanana rekomenda atu ema hotu halo reflesaun no redús tensaun iha família no komunidade. Nia hateten katak, maski Timor konsidera rai ida ne’ebé dominadu ho páz, violénsia ki’ik sira nafatin akontese no presiza atensaun.
“Joven sira tenke hanoin didi’ak oinsá mak bele komporta ho di’ak ba sira-nia an rasik, komunidade no família. Páskua mak tempu ida atu halo reflesaun hodi hadi’a-an,” dehan xefe governu.
Kada semana rua, Governu simu relatóriu hosi Ministériu Interiór ho Polísia Nasionál Timor-Leste kona-bá krime sira iha nasaun. Relatóriu sira ne’e hatudu katak violénsia la aas tebes, maibé sei akontese, no autoridáde sira kontinua koordena ho Ministériu Administrasaun Estatál no autoridade munisipál sira atu hatene situasaun iha kada suku.
Durante enkontru semanaál ho Prezidente Repúblika, PM Xanana aktualiza mós kona-bá servisu Governu nian, inklui desizaun importante sira ne’ebé Konsellu Ministru foti, liga ho povu nia moris no funsionamentu administrasaun públika.
Jornalista : Díli Post
