DiliPost.Com-Atu asegura dezenvolvimentu la’o di’ak iha rai laran Ministeriu Interior (MI), hamutuk ho Komandu Polisia Nasional Timor-Leste (PNTL), no Komandante Munisipiu sira hala’o konsolida iha seitor Seguransa.
MI Francisco Guterres informa, seitor Seguransa hanesan fator ne’ebe tenke hametin atu fo apoiu tomak ba iha dezenvolvimentu Nasional.
“Ami hala’o Workshop ne’e, hodi bele konsolida la’o hamutuk, ho parte Seguransa hotu iha papel atu bele dezenpeina iha konstrusaun, atu dezenpeina iha dezenvolvimentu Nasional.
Saida mak bele halo iha tinan 5 mai no bele halo iha tinan 2024 hanesan baze hodi bele hakat ba oin ho di’ak. Atu dezenvovimentu ba oin bele la’o ho di’ak no seguru,”hateten Francisco ba Jornalista iha Salaun Lariguto CNE Caicoli, foin lalais ne’e.
Tenke Iha Seguransa
Nia hatutan servisu ne’ebe halo ema la bele ta’uk mak Seguransa tenke forte, atu nune’e ema hotu livre atu hala’o ninia atividades.
“Ita hanoin uainhira iha rai ida atu hakarak dezenvolve nia an tenke iha Seguransa metin, hodi bele fo konfiansa ba ema hodi bele mai dezenvolve sira nia atividades negosiu, no ema livre atu la’o kalan no loron hodi fa’an sasan no ema seluk bele mai investe mos ho di’ak no seguru,”tenik Francisco.
Seitor Seguransa tenke metin no ba oin se’i ta’u prioridade ba seitor Seguransa ninian. Atu nune’e, bele dudu dezenvolvimentu Nasional la’o di’ak, ema hotu hakmatek livre kualker tempu no ema hotu bele sente seguru uainhira hala’o movimentu,”konklui Francisco.(Al)
