Dílipost.com, Loron 23 Fevereiru 2026 – Vítima ho inisiál ZFS iha oras 18:55 hato’o ona keixa kontra membru nain-rua husi unidade Polísia Militár, FALINTIL-Forsa Defeza Timor-Leste (F-FDTL), ho inisiál WLC no A, ne’ebé diskonfia baku no lesuk nia iha insidente ne’ebé akontese lalais ne’e.
Tuir relatóriu vítima nian ba autoridade, insidente ne’e mosu iha loron Kinta-feira, 05 Fevereiru 2026, oras tuku 12:00 meudia, iha área Fatuhada. Vítima dehan katak nia hetan agresaun físika ne’ebé halo nia sofre grave.
Informasaun ne’e vítima hato’o ba autoridade polísia liuhusi Diresaun Servisu Investigasaun Kriminál Nasionál (DSIKN), ne’ebé simu no halo rejistu ba kazu ne’e.
Relasiona ho alegasaun krime ofensa ba integridade fízika grave, Polísia Nasionál Timor-Leste (PNTL), liuhusi DSIKN, rejistu ona kazu ne’e ho númeru NUK: 0064/26-PNSIC no agora dadaun iha prosesu investigasaun.
Tuir lei vigora iha Timor-Leste, krime ofensa ba integridade fízika grave mak asaun ne’ebé fó perigu boot ba vítima, inklui baku to’o ran suli, uza objetu hanesan ai tohar, ou meius seluk ne’ebé bele kauza kanek grave. Krime ida ne’e regula husi Kodigu Penal Timor-Leste, liuliu iha artigu 141 (Ofensa ba integridade fízika simples) no artigu 142 no 143 (Ofensa ba integridade fízika grave).
Jornalista : DP
