Dílipost.com , Loron 24 Dezembru 2025 – Iha okaziaun selebrasaun Natál no Tinan Foun 2026, Komandante Jerál PNTL Polísia Nasionál Timor-Leste (PNTL) komisariu Jerál Polisia Henrique da costa hato’o mensajen votos de ksolok ba sidadaun sira no maluk PNTL hotu, hodi hafoun espíritu fiar, fraternidade no esperansa iha sosiedade.
Iha mensajen ne’e, komisariu Jerál konvida ema hotu atu hametin valór dame, solidariedade, respeitu no domin ba malu, hodi bele hasae konvivénsia armonioza iha komunidade sira hotu.
” Tinan ida ne’e lori signifikativu, maibé mós lori lisaun importante. PNTL reafirma nia kompromisu atu kontinua serbí povu ho profisionalizmu, dixiplina, integridade no dedikasaun, no hametin konfiansa entre polísia ho komunidade hodi kontribui ba estabilidade, seguransa no dezenvolvimentu nasionál,” dehan Komjer ba Jornalista sira iha Kuartel Jeral PNTL Kaikoli.
Durante períodu festeza Natál no Tinan Foun, PNTL apela ba ema hotu atu mantein pás no orden públika, respeita lei no valór sira ne’ebé halibur ita nu’udar nasaun ida. Mai ita selebra ho natal no tinan foun responsabilidade, diálogu no espíritu toleránsia.
Tanba ne’e PNTL apela ba utilizadór estrada públika sira atu kuidadu iha tráfiku rodoviáriu, respeita regra tránzitu nain no prezerva vida ema nian, hodi prevene asidente iha períodu festeza.
Ba Tinan Foun 2026, PNTL reafirma nia determinasaun atu kontinua serbisu la kolen ba manutensaun orden públika, protesaun ema no propriedade, no respeitu ba direitus umanus, iha kooperasaun metin ho instituisaun estadu hotu.
Ikus liu, PNTL hato’o liafuan rekoñesimentu espesiál ba maluk PNTL sira hotu ba esforsu, sakrifísiu no sentidu misaun nian, ne’ebé dala barak halo servisu do’ok hosi família hodi garante seguransa nasionál no bem-komún no seguransa Nasional.
” Ha’u mós hato’o votos de ksolok Natál no Tinan Foun 2026 ba sidadaun Timor-Leste tomak, ho saúde, dame, esperansa no konfiansa iha futuru ida ne’ebé di’ak liu,” konklui Komjer PNTL.
Jornalista : Azacsi Quintão
