Dílipost.com, 20 Maiu 2026 – Iha Diskursu Komemorasaun Restaurasaun Independénsia loron 20 Maiu 2026, Prezidente Repúblika José Ramos-Horta hatete katak Xanana Gusmão mak “Restaurador” independénsia Timor-Leste nian. Maibé, Eis-Prezidente Repúblika Francisco Guterres Lu-Olo dehan istória hakerek ona no labele halo distruisaun ba istória nasional.
Eis-Prezidente Repúblika Demokrátika Timor-Leste ba dala-7, Francisco Guterres Lu-Olo, rezeita diskursu hosi Prezidente Repúblika atuál ne’e no konsidera katak iha parte ida sala.
“Prezidente Repúblika nia diskursu iha parte ida sala halo distruisaun istória Timor nian. Istória hatene sé mak restaura independénsia Timor-Leste nian. Momentu Xanana Gusmão sei Prezidente eleitu seidauk tomada posse, iha Tasi-Tolu ha’u duni mak fó tomada posse Prezidente hafoin nia haknaar-an hanesan Prezidente Repúblika,” dehan Lu-Olo.
Tuir nia hateten, ba Xanana Gusmão laiha buat ida atu ko’alia, maibé diskursu hosi Prezidente Repúblika ohin loron ne’e sala.
Iha okaziaun ne’e, Prezidente Repúblika José Ramos-Horta dehan katak nia respeita opiniaun hosi Eis-Prezidente Lu-Olo, maibé nia iha interpretasaun rasik kona-ba istória restaurasaun independénsia Timor-Leste nian.
PR Ramos-Horta dehan katak iha loron 20 Maiu 2002, Xanana Gusmão mak lidera nasaun hanesan Prezidente Repúblika depois luta naruk ba ukun-an rasik.
“Ha’u hatene sé mak dada ita husi 1981 to’o Tasi-Tolu. Eis-Prezidente ko’alia nune’e nia direitu ko’alia. Ha’u nia interpretasaun, ha’u la’ós hakruk fali ba Eis-Prezidente ruma, ha’u koñese istória,” konklui Ramos-Horta.
Jornalista : Azacsi Quintão
