DiliPost.Com-Kazu entre juven baku malun iha Aldeia Rio de Janeiro, Ailoc Laran, Suku Bairru-Pite, akontese hale’u tuku 08:00 dader sa’en Otl. Rezulta katuas ida ho nia oan sai vitima tanba hetan ta’a husi juven balun, lori katana Mau-Beka ho Samurai no Polisia Nasional Timor-Leste (PNTL), kaptura kedas suspeitu nain rua (2), detein ona iha Sela detensun Eskuadra PNTL Dom Aleixo Comoro no evakua ona vitima nain 2 ba iha Hospital Nasional Guido Valadares (HNGV), hodi hetan tratamentu.
Tu’ir istoria ou kronolojia husi oan husi vitima Filomeno de Jesus informa ba Dili Post katak, problema akontese iha loron Domingu (05/11/2023), lorokraik. Suspeitu sira hemu tua iha dalan ninin hodi provaka vitima ho naran Joanzinho de Jesus no mosu baku malun to’o suspeitu sira tuda kanek vitima nia ulun.
Kazu ne’e, kontinua hikas iha loron Segunda-feira (06/11) dader, hodi rezulta vitima Joanjinho ho nia aman Filomeno hetan ta’a husi suspeitu sira.
Problema ne’ebe refere komesa horiseik loron Domingo, suspeitu ho naran inisial AP ho LN sira hemu tua ho nia kolega sira iha dalan ninin. Depois maun liu atu hola sigarru iha ‘Kios’ mai sira ‘Palang’ no sira husu ‘Sparing’ entaun maun dehan loos ona.
”Ita ‘Sparing’ depois sira fila foti fatuk tuda maun to’o ulun kanek, hodi problema tuda malun. Depois de ida ne’e, para tiha, kalan bo’ot sira tuda tan ami nia uma. Entaun, to’o dader sira barak mai uma balun lori Katana Mau-Beka ho Samurai hodi duni ami no suspeitu ida naran AP ta’a uluk ama, sorte ama hakru’uk la kona. Hafoin fila duni apa mak apa monu AP ta’a iha apa kotuk laran. ”
“Depois apa satan ho liman mak apa nia liman mos atu kotu, sorte maun sira balun mai husi Taibesse ajuda tuda sira ho fatuk hafoin sira hala’i. Se la’e apa mate fatin no maun Joanzinho hetan ta’a husi suspeitu LN ne’ebe duni tu’ir maun hodi ta’a nia ain kabun.”
“Sorte maun balun tuda tu’ir sira no hala’i hodi husik apa ho maun, se la’e apa ho maun bele mate fatin,”haktu’ir Marfilo de Jesus ba Jornalista iha Eskuadra PNTL Dom Aleixo Comoro Dili, Segunda-feira (06/11/2023).
Taibesse
Marfilo hatutan, sorte iha nia maun alin balun mai husi Taibesse mak ajuda tuda, se la’e nia aman ho maun bele mate hotu iha loron ida de’it. Tanba, suspeitu sira lori Katana ho Samurai mak duni tu’ir.
To’o nia aman monu ba rai suspeitu AP ta’a tu’ir iha kotuk laran no suspeitu AL ta’a tu’ir nia maun kona ain kabun. Hafoin ida ne’e, sira Telefone ba iha PNTL hodi hala’o atuasaun. Konsege ka’er ona suspeitu balun, maibe hela nain ida ne’ebe ho naran inisial AP Polisia seidauk ka’er, tanba hala’i lakon.
Tu’ir observasaun husi Dili Post, nota katak, oras ne’e, daudaun PNTL detein ona suspeitu nain 2 no halo investigasaun ba sasin nain 4 no parte investigasaun bolu familia vitima sira balun mai husi Taibesse hamutuk ema nain 7, hodi presta deklarasaun.(al)
