Dílipost.com, Loron 13 April 2026 – Autoridade governu liu husi Sekretáriu Estadu ba Asuntu Toponímia no Organizasaun Urbana (SEATOU) fó prazu loron-10 ba komunidade ne’ebé hela iha Merkadu Ossú no área Be’e Matan Loihunu, Munisípiu Vikeke, atu sai husi fatin refere antes loron 18 Abril 2026.
Desizaun ne’e bazeia ba preokupasaun governu kona-ba utilizasaun área merkadu no kontaminasaun bee ne’ebé konsidera ameasa ba saúde públiku.
Administrador Postu Administrativu Ossú, José da Silva Amaral, hateten katak reprezentante SEATOU iha Ossú halo ona levantamentu iha Merkadu Ossú no Bee Matan Loihunu, ne’ebé identifika komunidade sira ne’ebé hela iha área ne’e.
“Ami halo ona survey no sei realiza enkontru ho komunidade sira atu rona sira-nia preokupasaun antes halo rekomendasaun ba governu,” hatete Amaral ba jornalista DÍLI Post liu husi telefone, Domingu (12/04/2026).
Tuir informasaun ne’ebé hetan, Direktor Jerál SEATOU fó prazu loron-10 ba komunidade afetadu sira atu sai husi merkadu. Komunidade balun sei fila ba sira-nia knua, no balun seluk sei hela nafatin iha Ossú, liu-liu sira ne’ebé mai husi suku Uaguia, Uabubu no Ossorua Nahareka.
Iha parte seluk, Prezidente Autoridade Munisípiu Vikeke, Francisco C.S. de Gonzaga Soares, hatete katak preokupasaun autoridade mos bazeia ba pedidu komunidade no sosiedade sivil kona-ba situasaun iha Merkadu Ossú no Bee Matan Loihunu.
Notifikasaun kona-ba prazu loron-10 hahú husi 02 Abril 2026, ne’ebé fó ultimatu ba ema sira ne’ebé hela permanente atu muda, inklui mos atu hasai animal sira ne’ebé hakiak iha área ne’ebá.
Autoridade hateten katak merkadu destinadu ba atividade komérsiu deit, la’ós ba rezidénsia. Se to’o 18 Abril 2026 komunidade sira seidauk sai, ekipa SEATOU sei halo asaun atu sobu uma sira.
Iha área Bee Matan Loihunu, komunidade sira okupa fali área protejida bee, ne’ebé desde tempu Portugés reserva ona ba utilizasaun públiku. Resultadu teste hatudu katak bee ne’e kontaminadu ona, ne’ebé aumenta risku ba saúde komunidade.
Tuir observasaun husi BTL, uma permanente sira ne’ebé hari besik bee matan kontribui ba kontaminasaun, tanba sistema saneamentu la adekuadu.
Desizaun ne’e mos tuir orientasaun husi Primeiru-Ministru, ne’ebé determina katak komunidade sira tenke sai antes 18 Abril 2026. Autoridade lokal, inklui xefe suku sira, kontinua halo diálogu ho komunidade atu hetan solusaun ne’ebé di’ak.
“Komunidade balun hakarak hakerek karta ba SEATOU atu husu konsiderasaun tan, no agora ami hein resposta husi nivel nasional,” hatete Amaral.
Autoridade mos alerta katak uma sira ne’ebé iha besik Air Terjun Loihunu sei sobu, no komunidade husu atu kolabora ho governu. Possibilidade kompensasaun sei analiza liu husi prosesu ofisial.
Depois evakuasaun, área ne’e sei taka metin no sei hari postu seguransa husi PNTL no F-FDTL atu tau matan ba proteksaun bee matan.
Jornalista : Azacsi Quintão
