DiliPost.com – Sidadaun balun kontinua utrapasa froteira entre Timor Leste ho Republika Indonezia ho dalan ‘tikus hatama sasan ne’ebe kontra bandu.
Asaun prende husi autoridade seguransa Polisia Nasional Timor Leste (PNTL) liu husi operasaun auto-stop iha area Loes deteta transporta ne’ebe utiliza husi sidadaun inisial MP halai ho velusidade husi Batugade mai Dili hafoin ekipa duni tuir ‘kaer’ iha area Maubara Munisipiu Likisa.
Ho kapturasaun ne’e ekipa konjunta prende evidensia hanesan fugestis kaixa 7 no Manu futu entrega kedas iha komando PNTL Munisipiu Likisa hodi kontinua prosesu ba Ministeriu Publiku.
Iha intesvista Portavos Komando PNTL Superiendente Polisia, Joao Belo dos Reis informa operasaun ne’ebe ekipa konjunto halo involve mos ekipa interministeriadu konsege prende sasan ne’ebe kontra bandu sidadaun sira hatama hodi bele utiliza ba loron natal no tinan foun.
“Sasan sira ne’e ekipa konjunto entrega ba iha komndu Munisipiu Likisa no aprezenta ona ba iha Ministeriu Publiku ho numeru Nuk.0077/2025/Likisa,”hateten komandante Joao ba jornalista iha konferensia ne’ebe realiza iha Ministeriu Interior Vila-Verde, Kinta feira (11/12).
Nia hatutan, ekipa konjunta integradu ne’ebe mak monta kompostu husi Ministeriu Relevante sira no lidera hosi Alfandega ne’ebe mak servisu di’ak los, hodi halo operasaun no prende sasan kontra bandu barak liu-liu ba iha Fugetis no sasan sira seluk.
“Ita hotu akompana kada tinan tama iha tempu natal no tinan foun, iha inisiu fulan dezembru ne’e fugestis iha fatin-fatin ema sunu tarutu ona. Mais, iha tinan ida ne’e ema ladun sunu barak no diferensa, tanba ekipa ida ne’e servisu makas,” nia fundamenta.
Tan ne’e nia dehan, ekipa konjunto husi PSIK, SNI no DSIK inklui F-FDTL no Alfandega no UFP halo hela servisu kalan no loron hodi reforsa halo operasaun ba sasan ilegal sira ne’ebe kontinua tama iha lina Fronteira sira.
Nune’e mos komandante PNTL Munisipiu Likisa, Superiendente Calisto Gonzaga afirma PNTL prontu apoiu ekipa konjunta hodi kombate atividade ilegal, tanba atu kombate atividade ilegal persiza servisu hamutuk. Nune’e evidensia sira prende sei aprezenta ba iha Ministeriu Publiku.(ercia)
