DiliPost.com -Tribunal Judisial Primeira Instansia Dili, Kuarta feira (03/12) ne’e liu husi despaisu ba prosesu Primeiru Interogatoriu, deside aplika medida Prizaun Preventiva (PP) ba arguidu inisial VAC.
Tanba hamate vitima nain rua (2) Xefe Aldeia Metir Miguel Coreia do Santos (idade 50) no vitima Augusta de Deus hanesan arguidu nia fen ho kondisaun gravida. Kazu ne’e akontese iha Aldeia Metir, Suku Fatumasi, Postu Administrativu Bazartete, Munisípiu Likisa.
Ho aktu ne’e Ministeriu Publiku (MP) promove krime rua ba arguidu, Homesidu Agravadu no Krime Arma Branka.
Aliende ne’e Tribunal liu husi Juiza turnu Zulmira Auxiladora rona tiha arguidu nia depoimentu, ikus mai deside aplika medida PP ba arguidu.
Rona tiha despaisu Tribunal nian, Defeza husi arguidu nian deklara, nia parte mos konkorda ho despaisu Tribunal nian.
“Krime neebe imputa ba arguidu Homesidu Agravadu tanba nia fen neebe gravida, inklui mos Xefe Aldeia ita bele konsidera nain tolu maka mate, aumenta ho krime Arma Branka. Tanba, arguidu lori besi kanu inklui mos katana ka samurai ne’ebe iha, bazeia ba fotografia neebe iha,”dehan Defensor Publiku, Anzelmo Pinto Akara ba jornalista sira, iha Tribunal Dili, Kuarta-feira ne’e.
Nune’e mos iha alegasaun husi parte MP husu Tribunal atu aplika medida PP. Maibe, Defeza mos konkorda ho pedidu MP nian, tanba haree ba rekejitu jerais sira iha artigu 183 husi Kodigu Prosesu Penal, defeza mos haree prense ba iha perigu de fuga, pedidu kontinuasaun ba atividade kriminoza nomos ba iha perturbasaun, tan nee defeza mos konkorda.
No iha parte ida, Defeza haree katak, arguidu sofre hela moras mental, tan nee maka iha audensia nia laran arguidu konfensa. Maibe, saida maka arguidu deklara iha Tribunal no MP, defeza la entende tanba husu buat ida arguidu hatan fali oin seluk.
Defeza afirma, iha alegasaun mos konkorda ho medida koasaun neebe iha, maibe defeza prefere liu ba iha medida seguransa ba internamentu, maibe defaktu desizaun tun ho medida PP.
”Kuandu arguidu iha liur bele fo perigu ba nia an, no mos ba ema seluk, no defeza hare arguidu iha sinal ba moras mental,” tenik defeza ne’e.
Tuir informasaun ne’ebe jornalista online Dili Post rekolha iha trenu arguidu lori mai tribunal Tersa-feira loraik tuku 02 lokraik oras timor leste, maibé tribunal adia ba Kuarta hodi halo primeru interogatoru.
Iha audensia julgamentu ne’e prezide husi Juiza Zulmira Auxiladora, MP reprezenta husi Prokurador, Domingos Barreto, arguidu hetan asistensia legal husi Defensor Publiku, Angelmo Pinto Akara.
Jornalista : Octaviana da Costa
