Dílipost.com, Loron 9 Marsu 2026 – Folin konbustível iha sentru abastamentu iha kapitál Dili agora dada’uk sa’e, ne’ebé hamosu preokupasaun bo’ot iha komunidade, liu-liu ba utilizadór kareta públiku no privadu sira ne’ebé depende ba mina atu hala’o sira nia atividade loron-loron.
Tuir observasaun DiliPost.com nian, iha Sentru Abastamentu Pertamina Bebora, gazolina ne’ebé uluk fa’an ho folin $1.00 kada litru agora sa’e ona ba $1.20 kada litru. La’ós de’it gazolina, gasóleo mos hetan aumentu maka’as, husi folin $1.00 sa’e ba $1.33 kada litru.
Iha fatin seluk hanesan estasaun balun ohin loron mos sae ona aumentu folin mina, ne’ebé sa’e husi $1.09 kada litru ba $1.19 kada litru. Kondisaun ida ne’e halo komunidade balu hanoin katak iha posibilidade atu sentru abastamentu seluk mos bele tuir aumenta folin konbustível iha loron oin.
Komunidade sira ne’ebé uza kareta públiku no privadu hatudu preokupasaun tanba aumentu folin mina ne’e bele fo impaktu diretu ba kustu transporte no mos kustu moris loron-loron.
Kondutór kareta públiku balu dehan katak se folin konbustível kontinua sa’e, bele mos obriga sira atu konsidera hasa’e folin transporte ba pasajeiru sira.
“Agora mina sa’e maka’as, ami mos senti todan tanba ami depende de’it ba mina atu hala’o kareta,” dehan kondutór ida ne’ebé hasoru DiliPost.com iha área Bebora.
Maske nune’e, to’o agora seidauk iha deklarasaun ofisiál husi autoridade relevante ka entidade responsavel sira kona-ba razaun lolos ba aumentu folin konbustível ne’e. Komunidade hein katak governu bele halo observasaun no buka solusaun atu prevene impaktu bo’ot ba ekonomia komunidade nian.
DiliPost.com sei kontinua monitoriza dezenvolvimentu kona-ba mudansa folin konbustível iha merkadu nasional.
