Dílipost.com, Loron 1 Abril 2026 — Tuir Dekretu-Lei n.º 15/2024, loron 20 fulan-Marsu, Konsellu Ministrus aprova ona despeza no kontratasaun ba projetu infraestrutura importante balun iha rai laran, ho objetivu atu hadi’a asesu estrada no proteje área vulnerável sira.
Dílipost.com asesu iha Komunikado ofisiál governu, hateten, Iha deliberasaun ne’e, Governu autoriza implementasaun ba obra estrada emerjénsia “Larigutu–Uaguia, Tahagaba Dalirisi” (P44), ho montante total dolar amerikanu millaun 3,05. Projetu ida ne’e espera bele fasilita mobilidade komunidade no responde ba nesesidade emerjénsia iha área refere.
Nune’e mos, aprovadu konstrusaun Muru Retensaun iha Tibar River (P25), ho montante dolar amerikanu millaun 1,56, ne’ebé sei ajuda prevene risku inundasaun no erosão iha área ne’e.
Iha setór estrada rural, Governu mos autoriza obra “Open New Roads, Asumau–Liurai–Remexiu, Munisípiu Aileu” (P54), ho extensão 11,1 km no orsamentu dolar amerikanu millaun 1,96. Projetu ne’e konsideradu importante atu liga área rural sira no promove dezenvolvimentu ekonómiku lokal.
Aleinde ne’e, aprovadu mos obra “Open New Roads – Tutuluro–Mindelo–Binani Phase 1 (Sta 0+000–16+775 Km)” (P33), ho montante dolar amerikanu millaun 2,7, ne’ebé sei kontribui ba melloria asesibilidade no ligasaun entre suku sira.
investimentu sira ne’e reflete kompromisu Governu atu kontinua dezenvolve infraestrutura bázika, hasa’e konektividade no fó apoiu ba kresimentu ekonómiku no bem-estar komunidade sira iha Timor-Leste.
Projetu sira ne’e sei implementa tuir prosesu legal no tekniku ne’ebé vigora, ho esperansa atu kontribui ba dezenvolvimentu sustentável iha rai laran.
Jornalista : Díli Post
