DILIPost.Com – Polisia Nasional Timor-Leste liu-husi Diresaun Servisu Investigasaun Kriminal (DSIK) no junta ho PCIC no Migrasaun halo inspesaun ba empreza Capital VentureTimor (CVT), hodi identifika jerente, tanba dekonfia pratika jogu online.
Inspesaun ne’e identifika mos traballador Timoroan nain tolu inkui mos jerente ne’e rasik ne’ebe mak aluga edifisiu Eto Tower Mandarin dili. PNTL liu-husi DSIK hamutuk ho ekipa sekreta halo inspesaun iha edifisiu ETO, ne’ebe mak aluga husi Kompañia CVT, tanba autoridade hetan informasaun kona-ba pratika atividade jogu online iha área refere.
Enkuantu, ekipa sekreta PNTL mos bolu kedas trabalhador Timoroan nain-4 hodi ba iha edifisiu DSIK Komando Jeral PNTL Caicoli hodi halo indentifikasaun ba iha prosesu refere, nune’e bele kompleta provas investigasaun nian.
Iha prosesu nee, hala’o haleu tuku 15:05 durante oras hirak nia laran, ne’ebe lidera hosi Komandante Operasaun Superiendente Asistente Polisia Mouzinho Tavares Correia hamutuk ho ekipa DSIK no servisu Sekreta sira.
Durante atividade inspesaun nee ekipa rekolla ekipamentu evidensia ne’ebe konsege identifikasaun asesores ekipamentu informátiku hanesan,komputador marka LG-16, komputador (geral)-52, komputador Samsung-3, laptop HP-1, laptop (geral)-17, set Starlink-2.
Nune’e, hafoin ekipa sekreta PNTL ne’e rekolha hotu evidensia sira ne’e, ekipa mos deside hodi tau kedas fita polísia line ba iha kuartu rua (2) ne’ebe mak deskofia utiliza hodi hala’o atividade ne’e.
Molok ne’e, iha loron 03 Dezembru 2025 PNTL liu-husi Diresaun Servisu Investigasaun Kriminal (DSIK) ezekuta mandadu hosi Ministeriu Publiku halo buska no aprensaun ba iha Grand Dragon Lotaria ne’ebe lokaliza iha Prai dos Coqeirus nomos Sukursal iha Timor Plaza, tanba deskonfia pratika atividade jogu online ilegal.
Nune’e, liu-husi PNTL ninia buska no aprensaun identifika kompania Grand Dragon ne’e pratika atividade jogu Online maka Primeiru Ministru Kay Rala Xanana Gusmao uza nia kompotensain nu’udar Xefe Governu deside taka tiha kompania Grand Dragon ne’e, tanba la obdese ba rezolusaun Governu nian ne’ebe deside taka no bandu pratika jogu online ilegal.
JORNALISTA : AZACSI QUINTÃO
