DILI Post – Akontese semana rua liu ba iha fakuldade agrikultura Univesidade Nasional Timor Lorosae (UNTL) estudante sai vitima tanba sente la seguru ho asaun edukador ne’ebe deskonfia halo Violasaun Sekxual.
Ho asaun ne’ebe komete husi edukador ne’e reitor UNTL Joviano António da Costa simu informasaun no forma ona ekipa disiplinar halo investigasaun tanba asedu sekxual ne’e la merese atu komete.
Antes ne’e mos parte UNTL fo ona sansaun ba profesór nain rua ne’ebe komete asaun asedu sekxual hasoru estudante.
Aliende ne’e iha intervista reitór UNTL Joviano António da Costa informa katak semana kotuk mosu tan asaun ne’e iha fakuldade agrikultura no dadaun atu halo investigasaun.
“Kazu asedu ne’ebe akontese semana hirak liu ba iha fakuldade agrikultura, dadaun seidauk iha rezultadu,’’ hateten nia ba jornalista iha kna’ar Kampus Sentrál UNTL, Kuarta feira (22/04).
Reitor UNTL ne’e haktuir sira halo ona investigasaun ba kazu asedu sekxual ne’ebe akontese uluk, husi investigasaun ne’e rasik kuaze profesór na’in 2 hetan ona sansaun husi parte investigasaun UNTL no Komisaun Funsaun Publika nian.
Maibe, nia hatutan, dadaun iha tan kazu foun asedu seksual iha semana ida liu ba iha fakuldade agrikultura. Nune’e husi parte fakuldade hato’o ona pedidu mai Universidade.
“Ha’u ko’alia ona ho konsellu disiplinar UNTL no forma ona ekipa atu halo investigasaun, no Iha semana ida ne’e konsellu disiplinar sei halo investigasaun hotu sei hato’o ba komisaun funsaun publika,” tenik reitor Joviano.
Nia parte rasik la komprende tansa situasaun sira ne’e akontese hela de’it iha universidade.
“Ita hare interasaun profesór ho estudante di’ak tebes, maibe iha parte seluk mosu situasaun diferente, ita nia espetativa hakarak buat lao di’ak entre dosente no estudante sira iha ambiente ne’ebe mak seguru,” lamenta Joviano.
Ne’e duni, nia dehan presiza iha investigasaun ida ne’ebe klean atu indentifika kauza saida maka problema referidu akontese bebeik.Tuir nia, lolos situasaun hirak ne’e la merese atu akontese iha Instituisaun edukasaun nian. Maibe, dalaruma UNTL nia ema rihun resin, entaun karakteristik dalaruma la hanesan.
“Situasau sira hanesan ne’e presiza ita presiza lei no regulamentu ne’ebe rigor, tan ne’e liga ba karakteristika pesoal no moral kada profesór sira ida-idak nian,”subliña reitor UNTL ne’e. (ercia/STJ)
