DiliPost.com – Ejizensia ba Ministeriu Edukasaun (ME) to’o oras ne’e seidauk iha solusaun Professores Kontratadus (PK) sira ‘curhat’ ba kardial Virgillio do Carmo da Silva.
PK partilia ba ulun boot igreja ne’e, Tersa feira (20/02) ne’e, liu husi audensia iha rezidensia episkopal, Lecidere, Dili.
Iha sorumutu ne’e reprezentante PK, Celestinho Julio Belo husu tulun ba bispu don Virgillio, hodi ható’o problema ne’ebe dadaun ne’e sira hasoru.
Razaun sira mai hato’o ba parte igreja tanba ME la konsidera sira nia direitu ne’ebe hatuur ona tuir lei. Maiske, sira halo ona audiensia ho ME mais interpretasaun ba lei maka diferente.
Hafoin remata sorumutu PK, Celestinho informa ba jornalista katak tansa maka akontese entre sira ho ME ne’e fo impaktu ba estudante sira nia prossesu aprendijazen.
Nune’e, sira husu mos opiniaun husi parte igreja atu bele solusiona sira nia problema, no atu bele hato’o mos sira nia lian ba parte kompetentes.
“Ami hakarak iha solusaun justu ida, nune’e ami bele sente satisfas, tanba iha ME nia interpretasaun ba lei ne’e ami konsidera manipulativa inventadu, saida mak la koalia iha lei ME haruka ami atu prienxe fali,” hateten reprezentante PK ne’e iha Lesidere-Dili.
Fatin hanesan PK Amalia Rodrigues Ximenes mos hato’o nia difikuldade katak, problema ida ne’e afeita mos ba nia família, basá hanesan inan faluk ida ho oan ne’en ne’ebe antes ne’e depende ba vensimentu husi knaar hanesan manorin dadaun ne’e nia hasoru problema tanba nia kontratu ME hapara ona.
Professora ne’e sente triste tanba antes asina kontratu sira halao ona knaar manorin iha tinan barak nia laran, hodi fahe sira nia matenek no esperiensia ba estudante sira no ikus mai iha governu da sia la valoriza sakrifisiu no dedikasaun sira nian durante ne’e.
Hatan ba preokupasaun hirak ne’e, kardial Virgillio do Carmo da Silva hateten, liu husi tur hamutuk mak bele hetan solusaun ba problema ida, no bele iha mos rekoñesimentu ba esforsu ka dedikasaun husi parte balun.
Aleinde rona tia halerik ka preokupasaun husi professores hirak ne’e kardial mos relata katak la halo promesa ba sira, maibe nia sei esforsu buka dalan oinsa mak nia rona ona husi professores hirak ne’e.
“Hau mos bele hato netik ba parte kompetente sira, nune’e ukun nain sira mos bele fo netik tempu atu tur hamutuk hodi rona atu bele solusiona problema ida ne’e,” hakotu don Virgillio. (Leya)
