Dílipost.com, Loron 25 Juñu 2026 – Primeiru-Ministru Timor-Leste, Kay Rala Xanana Gusmão, simu “Prémiu Professór Doutór Jorge Miranda – Konstituisaun no Direitus Umanus” iha Aula Magna Reitoria Universidade de Lisboa, hodi afirma katak distinsaun ne’e pertense bá povu Timor-Leste tomak.
Iha serimónia entrega prémiu ne’e, PM Xanana Gusmão hateten prémiu la’ós onra pessoál, maibé reprezenta luta kolektiva povu Timor-Leste nian ne’ebé sofre no luta to’o hetan independénsia, liberdade no Estadu rasik.
“Premiu ne’e pertense bá povu Timor-Leste tomak, ne’ebé kontinua defende liberdade no konsolida Estadu demokrátiku,” hateten PM Xanana.
Konstituisaun Repúblika Demokrátika Timor-Leste, aprovadu iha tinan 2002, sai hanesan baze fundamentál bá Estadu demokrátiku, direitus umanus no Estadu de direito. Tanba ne’e Xanana Gusmão mós hato’o obrigadu bá Assembelia Konstituinte ne’ebé lidera prosesu konstitusionál ne’e.
Primeiru-Ministru subliña, independénsia Timor-Leste hetan tanba sakrifísiu povu no solidariedade internasionál, liu-liu hosi povu Portugal.
Liu tán ida ne’e, Xanana Gusmão dehan protesaun direitus umanus tenke sai parte ida iha vida loron-loron, no dezenvolvimentu labele limita de’it bá kresimentu ekonómiku, maibé tenke inklui edukasaun, saúde, empregu no protesaun ambiente.
Kona-bá demokrasia, PM Xanana alerta katak demokrasia jovem hanesan Timor-Leste presiza kontinua hametin instituisaun sira, kapitál umanu no infraestrutura atu asegura estabilidade no progresu nasionál.
Iha intervensaun kona-bá situasaun mundu, nia apela bá juventude atu hametin multilateralizmu no respeitu bá direitu internasionál, no husu implementasaun resolusaun ONU kona-bá autodeterminasaun Sahara Osidentál.
Iha serimónia ne’e, Professór Jorge Miranda, figura importante iha área konstitusionalizmu Portugés, hato’o agradesimentu bá atribuisaun prémiu no konsidera distinsaun ne’e hanesan onra bá área direitu konstitusionál tomak.
Nia refere bá Primeiru-Ministru Xanana Gusmão hanesan figura histórika ne’ebé simboliza luta bá liberdade no dignidade povu Timor-Leste.
“Konstituisaun Timor-Leste reprezenta susesu importante iha konstrusaun Estadu demokrátiku modernu, bazeia bá direitus umanus, separasaun podér no supremasia lei,” dehan Jorge Miranda.
Reitór Universidade Lisboa, Professór Luís Ferreira mós hato’o boas-vindas no agradesimentu bá prezensa Primeiru-Ministru Timor-Leste no konvidadu sira hotu.
Atribuisaun prémiu ne’e mak forma ida atu rekoñese kontribuisaun iha área konstituisaun no direitus umanus, no fortalese diálogu akadémiku entre Portugal ho países luzófonos, liuliu Timor-Leste.
Reitor mós reafirma kompromisu Universidade de Lisboa atu kontinua apoia formasaun akadémika no promosaun valór demokrátiku sira, hodi hametin liután kooperasaun entre instituisaun rua iha futuru.
Jornalista : Azacsi Quintão
