DiliPost.com -Tribunál Judisiál Primeiru Instánsia Dili (TJPID), iha loron Sabadu (24/2/2024), hala’o interogatoriu da-huluk ba arguidu nain tolu (3), ne’ebé envolve iha kazu Farmasia Moris Foun Colemera dezkonfia hatama ai-moruk illegál mai Timor-Leste (TL), ho item 2.50.
Iha prosesu primeiru Interogatoriu, Ministeriu Públiku (MP), reprezenta husi Prokuradór Matias Soares promové arguidu nain 3 naran inisial DIBS, JP no HDC ba Krimi Artigu 140 hateten Omesidu Niglijente, ho Artigu 214 hateten, produtu sira falsu ou a’at.
No Artigu 303 hateten falsifikasaun ba dokumentus ou anotasaun téknika, 304 hateten, konaba falsifikasaun agravada. Artigu 310 konaba kontrafasaun ba selus, kuñu, marka ou xansela sira.
Artigu 314, konaba Fraude Fizkál Artigu 315 konaba Importasaun no Esportasaun ilísita husi riku soin ou Merkadoria sira. Artigu 316 sita konaba kontra-bandu, Arigu 317 sita konaba hakseko an.
Medida
Durante Interogatoriu MP alega arguidu DIBS ho medida koasaun Prizaun Preventiva (PP). Tanba, durante iha Interogatoriu da-huluk MP hare’e arguidu nia hahalok prienxe Medida koasaun PP.
Enkuantu, arguidu JP, MP husu ba Tribunál aplika medida koasaun proibisaun aujénsia hodi sita arguidu nia Pasaporte. Pur-enkuantu arguida HDC MP husu ba Tribunál aplika Medida koasaun Aprezentasaun Periodika (AP), kada fulan, dala ida, arguidu tenke aprezenta an ba MP no Polisia besik.
Defeza
Ho ida ne’e, Defeza husi arguidu nain 3 Advogadu Privadu Pedro Camões husu Tribunál atu aplika Medida koasaun adekuadu ba arguidu sira. Tanba, arguidu sira la iha indisiu ida katak, komete Krimi ne’ebé MP promove ba sira.
Defeza husi arguidu sira husu ba Tribunál atu foti Medida koasaun nesesariu ba nia kliente sira. Ida Medida koasaun katak, Farmasia Moris Foun tenke selu de’it koema ba Estadu.
Tanba, ai moruk ne’ebé foin daudaun Autoridade Polísia sita ne’e, ai-moruk barak mak iha lisensa no balun posibilidade la iha lisensa husi Ministeriu Saude (MS). Medida seluk ne’ebé Defeza husu ba Tribunál aplika Medida koasaun aprezentasaun Periodika ba arguidu sira hodi aprezenta an kada fulan, dala ida iha Edifisiu MP no Polisia besik.
Proibisaun
Medida koasaun seluk ne’ebé Defeza husu ba Tribunál atu aplika ba nia kliete sira Proibisaun no Medida koasaun seluk ne’ebé Tribunál aplika husu ba parte Autoridade Polisia atu devolve hikas ai-moruk ne’ebé antes ne’e, Polísia halo ona aprensaun ba Farmasia Moris Foun.
Farmasia, bele halo fali nia atividade Regular hodi utiliza ai-moruk hirak ne’e, ba hala’o atendimentu.
Hafoin rona tiha deklarasaun husi parte hotu, Tribunál entende Medida koasaun 4 mesiona iha leten nesesaria dunik hodi aplika ba arguidu sira.
Garante
Defeza husi arguidu nain 3 Advogadu Privadu Pedro Camões hanesan DIBS, JP no HDC hateten, Tribunál aplika Medida koasaun 4 ba arguidu nain 3 ho Medida koasaun, signifika Farmasia Moris Foun tenke selu koema ba ai-moruk sira ne’ebé dzskonfia la rejista hodi garante prosesu investigasaun.
Medida seluk ne’ebé Tribunál aplika ba arguidu sira proibisaun aujénsia, la bele sa’i husi teritoriu Timor-Leste (TL), durante investigasaun ba kazu ne’e, la’o hela. Medida seluk Tribunál aplika no husu parte Autoridade Polísia atu devolve hikas ai-moruk item 150 antes ne’e, Polisia Nasional Timor-Leste (PNTL), asegura ona. Hodi nune’e, Farmasia Moris Foun bele halo fali ninia atividade hanesan bain-bain hodi hal atendimentu ba públiku.
Informa
No Medida koasaun seluk ne’ebé Tribunál aplika AP fulan ida dala ida, ba MP bainhira atu sa’i husi teritoriu Nasionál tenke informa ba Polísia.
Ho Medida ne’ebé Tribunál aplika ne’e, arguidu hirak ne’e, Tribunál husik sira bele fila ba uma. Hanesan parte Defeza ba,”ami nia desizaun adekuandu,”Pedro ba Jornalista hafoin interogatoriu da-huluk iha TJPID, Sabadu (24/02/2024).
Valór koasaun osan ou valór koema ne’ebé Farmasia Moris foun atu selu ba Estadu, Defeza Pedro la hatene, tanba nia parte seluk seidauk simu despaixu husi Juiz Turnu.
Tanba ne’e, Juiz ne’ebé preside interogatoriu da-huluk ba kazu Farmasia Moris Foun mak Juiz José Maria de Arajo, MP reprezenta husi Matias Soares, arguidu sira hetan asistensia husi Advogadu Privadu Pedro Camões, no Januario Martins.(octa)
