Dilipost.com, 13 Janeiro 2026– Komunidade, estudante no juventude husi Suku Neen Mota Sorin husi Postu Administrativu Ossú Munisípiu Viqueque, foin lalais ne’e halibur malu hodi hato’o sira-nia preokupasaun boot kona-ba desizaun taka Eskola Sekundária Paralelu Uagia. Sira konsidera katak desizaun ne’e la iha fundamentu legal ne’ebé klaru no bele viola direitu fundamental sidadaun nian ba edukasaun.
Joventude suku Ossorua Nelson Da silva hateten, iha enkontru ida ne’ebé hala’o ho juventude sira kestiona legalidade desizaun taka eskola, tuir sira-nia hanoin, prosesu ne’ebé la’o hela la tuir prosedimentu legal sira ne’ebé hakerek ona iha Dekretu Prezidente no Diploma Ministerial relasionadu ho abertura no taka instituisaun edukasaun.
“Edukasaun mak fuan no ran ba dezenvolvimentu estadu nian. Taka eskola ne’e hanesan insultu ba ami-nia futuru,” dehan reprezentante juventude suku ne’en.
Nia argumenta tan katak Konstituisaun Repúblika Demokrátika Timor-Leste(KRDTL) artigu 59 garante katak sidadaun hotu iha direitu hanesan atu hetan asesu ba edukasaun.
Impaktu Diretu Ba Estudante
Komunidade no estudante sira mós hato’o preokupasaun kona-ba impaktu diretu ne’ebé sei hasoru se eskola paralelu ne’e taka. Ida husi preokupasaun boot mak distánsia ba eskola alternatívu sira ne’ebé dook liu.
Sira hateten katak estudante sira bele hasoru risku seguransa tanba presiza la’o ain ba kilometru lima ou neen barak. Iha tempu udan, kondisaun dalan sai perigozu no bele halo estudante barak desisti husi eskola. Alén ne’e, inan-aman barak la iha kbiit ekonomia atu selu transporte ba eskola.
Planus Aksaun
Hodi responde ba situasaun ne’e, grupu juventude no estudante deside ona atu halo medida legál no polítika. Sira planu atu hala’o konferénsia imprensa iha Dili, loron Quinta-feira, tuku 09:30 dadeer, iha Jardín 5 de Maio, hodi hato’o sira-nia knaar ba públiku no mídia.
Alén ne’e, sira sei haruka karta ofisiál ba Ministériu Edukasaun atu husu esplikasaun no buka solusaun. Petisaun mós sei entrega ba Prezidente Repúblika no Parlamentu Nasionál, liuliu Komisaun G, ne’ebé responsavel ba asuntu edukasaun.
Apelu Organizasaun sira husu ba juventude no estudante hotu iha Postu Administrativu Ossu no Munisípiu Viqueque tomak atu hamutuk iha luta ne’e. Sira konvida mós mídia nasional atu prezente iha konferénsia imprensa hodi rona diretu preokupasaun husi komunidade Lima Mota Sorin.
“Ami sei la para to’o hetan fali ami-nia direitu ba eskola ne’ebé besik no ho kualidade,” dehan deklarasaun hosi grupu juventude.
