DiliPost.com- Sekretáriu Estadu Veteranu, Cesar dos Santos da Silva “Merak” informa kona ba serimónia fúnebre ba saudozu Francisco Guterres “Lú-olo” sei halo iha loron 26 fulan Junu 2026 ho sekuénsia atividade ne’ebé prepara ona antes selebrasaun ofisiál.
Nia salenta, senta-feira bairua dia-26 dadeer loron serimónia nian, Saudozu sei lori husi rezidénsia Farol ba Sede Komité Sentrál FRETILIN, depoiz kontinua ba Kuartél Jenerál F-FDTL iha Fatuhada, Palasiu Prezidente no Parlamentu Nasiona.
“Hafoin ramata vizita ba instituisaun sira ne’e, saudozu sei lori bá Jardín Eroi Metinaru, fatin ne’ebé prepara ona atu haloot saudozu besik saudozu Avó Ma’huno no Avό Xavier nian iha Metinaru,” dehan nia ba jornalista iha Faról, Kuarta-feira (24/06/2026)
Nia hatutan Selebrasaun missa fúnebre sei hala’o iha Igreja Katedrál Dili, tuku 11:00 Otl iha Sesta (26/06). Hafoin ramata vizita ba instituisaun relevante sira, saudozu sei lori ba Katedrál atu partisipa misa no presta omenajen ikus.
Sekretáriu Estadu Veteranu ne’e dehan sei haloot Antigu Prezidente Repúblika, Francisco Guterres “Lú Olo”, entre Proklamadór Francisco Xavier do Amaral no Saudozu Ma’huno iha Jardín Eroi Metinaru.
Tuir Merak atividade presta omenajen sei kontinua to’o 25 Juñu 2026 no komisaun organizadora husu ba ema hotu-hotu atu respeita regra no prosedimentu ne’ebé estabelese ona.
“Ami orienta hela ema hotu-hotu neʼebé mai atu tuir regra sira-neʼebé ami estabelese ona nune’e serimónia ne’e bele lao ho di’ak no ordenadu,” tenik sekretariu Estadu Merak.
Nia mós haktuir katak atividade omenajen hahú ona iha loron 23 Juñu 2026, tuku 13:00 OTL, ho prezensa husi instituisaun Estadu sira iha Dili.
Relasiona ho posibilidade prezensa Primeiru-Ministru, Xanana Gusmão no membru Governu sira iha serimónia fúnebre, Merak dehan katak to’o agora seidauk iha konfirmasaun ofisiál tanba Primeiru-Ministru hala’o hela vizita ofisiál ba rai-li’ur.
“Ha’u seidauk bele fó informasaun loloos tanba Primeiru-Ministru iha hela vizita ofisiál ba rai-li’ur. Tanba ne’e, ami seidauk bele fó resposta definitiva kona-ba sira-nia prezensa iha serimónia fúnebre ne’e,” nia esplika.
Nune’e mos Primeiru-Ministru Interinu, Mariano Assanami Sabino, deklara sei haloot Saudozu Lú Olo iha fatin level aas liu iha Saudozu José Antonio da Costa “Ma’Huno nia sorin.
“Tanbasá maka aas, tanba razaun forte maka respeitu iha nia prosesu hotu iha gerrilleiru iha ai-laran no ikus hanesan Prezidente Asembleia Konstituinte, hakerek
Konstituisaun, aprova Konstituisaun ne’ebé sei la akontese tan bá-oin, dala ida de’it sei la repete tan”, nia konklui.(Octa)
