Dílipost.com Loron 06 Juñu 2026— Primeiru-Ministru (PM), Kay Rala Xanana Gusmão apresia partisipasaun involvimentu eskola sira iha Feira Oseanu 2026 iha Lecidere entre 5 to’o 8 Juñu, liu-liu Eskola CAFE hosi Díli ne’ebé aprezenta espozisaun kona-bá edukasaun ambientál no protesaun rekursu marítimu sira nu’udár parte hosi komemorasaun Loron Mundiál Oseanu.
Durante vizita bá stand sira iha feira ne’e, PM Xanana enkoraza estudante no instituisaun edukativa sira atu kontinua involve iha kampaña protesaun ambientál, liu-liu iha área konservasaun tasi no redusaun poluisaun plástiku.
Xefe Governu konsidera kontribuisaun hosi eskola sira importante tebes atu forma jerasaun foun ne’ebé konsiente kona-bá importánsia Oseanu nu’udár rekursu naturál esensiál bá ema nia moris no dezenvolvimentu nasaun.
“Protesaun bá Oseanu la’ós de’it responsabilidade Governu, maibé responsabilidade ema hotu-hotu nian, inklui estudante no komunidade tomak,” hateten PM Xanana.
Koordenadora Jerál Eskola CAFE iha Timor-Leste, Lina Vicente apresia vizita Primeiru-Ministru nian bá stand espozisaun eskola ne’e no konsidera prezensa Xefe Governu hanesan motivasaun bo’ot bá komunidade eskolár.
Tuir Lina Vicente, estudante no profesór sira sente orgullu tanba sira-nia esforsu iha área edukasaun ambientál no protesaun Oseanu hetan atensaun direta hosi líder másimu IX Governu Konstitusionál.
“Vizita ida-ne’e fó motivasaun bo’ot bá estudante no profesór sira atu kontinua promove edukasaun ambientál no kontribui bá konservasaun tasi no ambiente,” dehan Lina Vicente.
Iha nia stand, Eskola CAFE aprezenta atividade no inisiativa sira ne’ebé promove konsiénsia estudante kona-bá importánsia konservasaun Oseanu, inklui esforsu atu redús poluisaun plástiku, proteje biodiversidade mariña no promove prátika sustentável iha ambiente eskolár.
Espozisaun ne’e mós inklui traballu estudante sira nian, materiál edukativu no obra arte ho tema tasi, ne’ebé reflete kompromisu eskola atu forma jerasaun ne’ebé iha responsabilidade bá ambiente.
Partisipasaun Eskola CAFE integra programa Semana Nasionál Oseanu 2026 ne’ebé involve grupu espozitór 60 hosi instituisaun governamentál, eskola, organizasaun no seitór privadu sira iha Díli.
Eventu ne’e hanesan esforsu kolaborativu atu reforsa protesaun Oseanu nu’udár patrimóniu nasionál no fonte sustentabilidade komunidade kosteira sira iha Timor-Leste.
Jornalista : Azacsi Quintão
