Dílipost.com, Loron 24 Juñu 2026,- Munisípiu Vikeke selebra misa espesiál ida hodi reza no presta omenajen ba saudozu Eis-Prezidente Repúblika Francisco Guterres “Lú Olo” ne’ebé hakotu iis iha Kuala Lumpur, Malázia.
Prezidente Autoridade Munisípiu Vikeke Francisco C.S de Gonzaga Soares hatete, Munisípiu Vikeke selebra missa bá Eis-Prezidente Repúblika, Eis-Prezidente Parlamentu Nasionál, Eis-Prezidente Asembleia Francisco Guterres Lú-Olo nian, nu’udar forma ida hosi povu no autoridade munisípiu nian atu fó respeitu ikus ba líder nasional ida ne’ebé moris iha munisípiu Vikeke no fó kontribuisaun boot ba luta libertasaun no konstrusaun Estadu Timor-Leste.
” Ohin Misa hala’o iha Loraik oras 16 : 00 Misa hanesan tradisaun ba ita, familia ou maluk ruma ita nia líder, Munisípiu Vikeke konsidera hanesan uma nain kedas, ami husu misa ida reza ba erói ida bá Líder Nasionál ita reza hodi hetan fatin di’ak,” hateten Pam Vikeke ba Jornalista Dilipost.com liu husi Via Telefone.
Tuir loloos Munisípiu Vikeke bá direta Nasionál hodi fó omenajen ba saudozu Eis-Prezidente Repúblika Francisco Guterres Lú-Olo, maibé hasoru malu ho Konsellu Kombatentes Libertasaun Nasionál (CCLN) hateten tenke selebrasaun Misa iha munisípiu Vikeke.
” Ami konvida povu Vikeke ne’ebé mak la bá Nasionál, entuan ita reza hamutuk ba ita-nia aman ita nia erói ita nia asuwain, Munisípiu lakon ema di’ak, ema Vikeke dahuluk sai Prezidente Repúblika, ita agradese ba nia liuhusi selebrasaun misa,” nia dehan.
Selebrasaun misa iha Vikeke ne’e sai parte hosi ida ne’ebé daudaun hala’o iha territóriu tomak durante períodu lutu nasional loron hitu, ne’ebé Governu dekreta hodi omenajeia memória no legadu saudozu Eis-Prezidente Repúblika Francisco Guterres “Lú Olo”, figura sentral ida iha luta libertasaun no konstrusaun Timor-Leste nu’udar Estadu soberanu no demokrátiku.
Nia dehan Aban dadersan madrugada Prezidente Autoridade Munisípiu Vikeke hamutuk ho Diretór sira nomós komunidade balun sei desloka husi Vikeke bá dili hodi fó omenajen bá Aman saudozu Eis-Prezidente Repúblika Francisco Guterres Lú-Olo.
Jornalista : Dílipost.com
