DiliPost.com – Iha loron 13 Fevereiru Sekretáriu Estadu Komunikasaun Sosiál (SEKomS), Expedito Loro Dias Ximenes ho kometiva hala’o vizita traballu ba Canbera-Austrália no fila hikas mai Dili, dia 17 Fevereiru 2024.
Iha vizita ne’e hala’o bazeia ba konvite husi Australia Broadcasting Cooperation (ABC) no akompaña husi Prezidente Rádio Televizaun Timor Leste, Empreza Públiku (RTTL, E.P.), José António Belo “Taraleu” ho Vise Prezidente Technology Informatics Communication-Timor, Institutu Públiku (TIC-Timor, I.P.), Eligio Monis do Rego.
Tuir komunikadu ne’ebe online DiliPost. com asesu husi Mídia SEKomS, Segunda feira (19/02) ohin, relata durante iha Cambera, loron 14 Fevereiru, SEKomS hamutuk ho membru governu no akadémiku partisipa diskusaun kona-ba mudansa klimátika ne’ebé organiza husi National Pres Club Austrália (NPCA).
Liu husi diskusaun nakloke ne’e partisipa másimu husi editor senior no nain ba mídia sira iha Austrália no transmisaun direta husi televizaun ABC.
Aliende ne’e iha loorn 15 Fevereiru, SEKomS ho delegasaun hasoru malu ho Vise Ministru Negósiu Estranjeiru i Komérsiu, Mr. Tim Watts iha Parliament House.
Iha sorumutu ne’e SEKomS hato’o agradesimentu ba apoiu hirak ne’ebé Governu Asutrália liu husi The Department of Foreign and Trade (DFAT) fó ba Timor-Leste liuliu formasaun reportajen investigativu ba Jornalista RTTL, EP.
Mr. Tim Watts hatete, DFAT sei nafatin suporta ho apoiu ba RTTL, EP no dezenvolvimentu mídia iha Timor-Leste.
Iha oportunidade ne’e SEKomS husu mós apoiu atu dizitaliza arkivu konteudu ne’ebé durante ne’e iha de’it Mini DV ne’ebé kontein atividade istóriku dezde 1999 to’o 2017.
Ho objetivu ida ne’e mós maka SEKomS ho delegasaun hala’o vizita ba kompañia privadu ida naran DAM Smart ne’ebé espesialista duni iha mudansa konteudu analog ba dizital.
Nune’e mos loron 16 Fevereiru, SEKomS halo enkontru ho dirizente máximu ABC no DFAT hodi ko’alia nafatin mós kona-ba kestaun formasaun jornalista RTTL, EP ho Mídia sira seluk iha Timor-Leste ho programa intensive iha area jornalizmu investigativu ho mós dijitalizasaun arkivu istóriku RTTL nian.
Instituisaun rua ne’e (ABC ho DFAT) hato’o sira nia ksolok no afirma sira nia komitementu maka’as atu nafatin apoia Timor Leste iha area Komunikasaun Sosial liuliu programa formasaun jornalizmu iha area reportajen investigativu nune’e mós dizitalizasaun arkivu RTTL nian.Iha oportunidade vizita Parliament House, dirizente ABC ho DFAT halo mós ajenda espesiál ba SEKomS ho delegasaun partisipa iha plenária Parlamentu Nasionál Austrália nian. Molok hahú plenária, Prezidente Parlamentu Nasionál introduz bainaka espesial SEKomS ho delegasaun nia prezensa. (**)
