DiliPost.com- Arguidu nain rua ho insial JACR no MZX tenke kumpri Prizaun Preventiva (PP) komarka Becora ligadu ho kazu ne’ebe sira komete foin lalais iha Praia dos Cuqueiros.
Kinta Feira (11/06) ne’e Tribunál Judisiál Primera Instánsia Dili (TJPID) liu husi despaisu ba iha prosesu primeiru interogatoriu, deside aplika medida PP ba arguidu nain rua.
Arguidu nain rua submete mai iha Tribunal, tanba alegadamente envolve iha krime tolu ne’ebé hadau karteira iha Praia Dos Coquiros hodi rezulta Nadine Ribeiro do Carmo lakon vida, no Euodia Agile do Carmo hetan kanek.
Arguidu nain rua nia hahalok rejista ho NUK, 0602/26.PNSIK, no Ministeriu Publiku (MP) promove arguidu nain rua ho krime, Roubu neebe previstu iha artigu 253, no krime Ofensa Neglijente neebe previstu iha artigu 148, no krime Homesidu Neglijente neebe previstu iha artigu 140 husi Kodigu Penal Timor Leste nian.
Iha despaisu Tribunal nian liu husi Juiz Turnu Ivan Patrocenio deside aplika medida PP yang ba arguidu nain rua, tanba konsidera iha indisus forte ba krime neebe MP promove mai iha Tribunál.
Rekorda fali katak, iha alegasaun MP ne’ebé reprezenta husi Prokuradór Turnu Aderito Tilman husu Tribunál atu aplika medida PP ba arguidu nain rua.
Enkuantu husi parte defeza nian, Defensor Publiku Fernando de Carvalho husu Tribunal tetu, atu aplika medida ba arguidu nain rua.
Prosesu primeiru interogatoriu ne’e, prezide husi Juiz Turnu Ivan Patrocenio, MP reprezenta husi Prokurador Aderito Tilman, arguidu nain rua hetan asistensia legal husi Defensor Publiku Fernando de Carvalho.
Hafoin desizaun Polísia ezekuta despaixu Tribunál nian hodi lori arguidu na’in rua ba estabelesimentu Prizionál Bekora hodi kumpre medida koasaun Prizaun Preventiva ne’ebé Tribunál deside ona liuhusi despaixu.(Júlia)
