DiliPost.com- Tribunál Judisial Primeira Instansia Dili, Kinta feira (23/07) ne’e
hatun despaxu aplika medida koasaun Aprezentasaun Periodika (AP) ba arguidu ho inisial JMDS.
Desizaun ne’e Tribunal foti
tanba arguidu utiliza Kupon Mina Governu nian ba ense kareta privadu iha estasaun mina Aitula Fuel Komoro Dili.
Aliende ne’e iha prosesu Primeiru Interogatoriu Tribunal deklara durante prosesu arguidu konfesa katak arguidu uza duni kupon mina Governu nian ba ense kareta privadu iha pertamina Dili laran dala barak ona.
Ho nune’e Tribunál deside hodi aplika medida koasaun AP semana ida dala ida ba Postu Polísia ne’ebé besik hodi prosesu investigasaun ne’e kontinua la’o.
Nune’e mos iha alegasaun Ministeriu Publiku (MP) husu Tribunal atu aplika medida koasaun Termu Identidade Rezidensia (TIR) no medida koasaun AP.
Atu nune’e prosesu investigasaun kontinua la’o, no alegasaun parte Defeza nian konkorda alegasaun MP no hodi aplika medida koasaun TIR no medida koasaun AP.
Hafoin rona tiha deklarasaun arguidu nia no alegasaun MP no parte Defeza nia, ikus mai Tribunál deside hodi aplika medida koasaun AP ba arguidu.
Tuir informasaun ne’ebé jornalista asesu hosi funsionariu balun iha Komisaun Anti Korupsaun (KAK) katak, hafoin KAK hetan informasaun ekipa investigasaun tun direita hodi hala’o operasaun flagrante delitu hodi kaptura no detensaun ba arguidu JMDS.
“Iha Segunda-feira ne’e KAK ba detein Detidu ne’e iha estasaun mina Aitula Fuel Komoro Dili , iha tuku 9 dader tanba nia ense senius Kombustivel Governu nia, ba nia kareta privadu, arguidu nu’udar funsionariu Públiku no Xefe Departmentu Patrimoniu iha Ministériu balun”, sita liu husi komunikadu iha pajina ofisial KAK ne’ebe online Dili Post Asesu Kinta feira ne’e.
Entertantu MP promove arguidu ho krime Pekulatu iha artigu 83 iha kodigu penal Timor-Leste.
Antes ne’e mos iha loron Segunda-Feira, Investigador KAK husi Unidade Informasaun no Seguransa halao operasaun fragante de litu hodi kaptura no halo detensaun ba Funsionariu Publiku JMDS, nu’udar Xefe Departamentu Patrimonio iha Ministériu ida.
Hafoin halo prosesu identifikasaun, investigador KAK desidi hodi halo detensaun ba suspeitu JMdS durante 72 horas iha sela detensaun KAK Farol Dili tamba hahalok ne’ebé komete husi suspeitu priense elementu krimi ba Pekulatu de Uzu tuir artigu 83 Lei Nu. 7/2020 Medidas Prevensaun no Kombate Korrupsaun.
Jornalista : Octaviana Costa
