Dílipost.com,LIUZHOU Xina – Delegasaun jornalista Timor-Leste hamutuk ema na’in 24 vizita SAIC-GM-Wuling (SGMW) Intelligent Island Manufacturing Factory, iha Liuzhou, Rejiaun Autonómu Guangxi Xina, atu aprende diretamente kona-ba teknolojia manufatura intelijente, inovasaun indústria otomótiva no dezenvolvimentu kareta foun enerjia.
Durante vizita, Enjeñeiru Produsaun SGMW, Cai Lin, esplika katak kompañia Wuling hahú nia istória iha tinan 1958, hafoin Governu Xina promove dezenvolvimentu indústria iha Guangxi. Husi fábrika ne’ebé produz motór diesel ba ró, Wuling transforma an sai ida hosi produtór kareta boot liu iha Xina.
“Jerasaun uluk hosi traballadór Wuling hasoru difikuldade barak, maibé sira servisu ho perseveransa no espírito forte. Esforsu sira-ne’e mak harii fundasaun ba dezenvolvimentu Wuling to’o ohin loron,” hateten Cai Lin iha ba Jornalista Timoroan nain-24 ba Vizita Fábrika Inteligente SAIC-GM-Wuling.
Nia hatutan katak Wuling kontinua halo inovasaun no expande ba merkadu internasionál, ho objetivu atu produz kareta tuir nesesidade konsumidór.
Delegasaun mós haree diretamente liña produsaun automatizadu ne’ebé uza Automated Guided Vehicle (AGV) atu lori kareta hosi estasaun ida ba estasaun seluk durante prosesu montajen.
Cai Lin dehan sistema intelijente ne’e permite fábrika produz modelu kareta neen iha liña produsaun ida deit, ne’ebé hasa’e efisiénsia no hamenus gastus investimentu.
” Kompara ho liña produsaun tradisionál, sistema AGV permite ami adapta lalais ba modelu foun sira, la presiza harii liña produsaun foun ba kada modelu. Ida-ne’e halo produsaun sai fleksível no efisiente liután,” nia dehan.
Iha sentru monitorizasaun dijitál, delegasaun aprende katak dadus hotu kona-ba produsaun halibur iha sistema sentrál ida ne’ebé monitoriza prosesu fabriku iha tempu real, husi montajen to’o entrega kareta ba konsumidór.
” Liuhosi sistema informasaun ida-ne’e, ami bele monitoriza kada etapa produsaun no hamenus taxa defeitu ba merkadu to’o deit 0,01%,” katak Cai Lin.
Enjeñeiru ne’e mós esplika katak SGMW aplika padraun teste rigorozu atu asegura kualidade no seguransa kareta sira. Kareta ida-idak tenke liu hosi liuhusi 30 tipu teste, inklui teste iha kondisaun klimatika ekstremu, teste durabilidade liuhusi oras 10.000 no teste distánsia to’o liuhusi 1 milliaun kilómetru.
” Objetivu hosi teste rigorozu sira-ne’e mak atu garante katak kareta ne’ebé to’o ba konsumidór iha kualidade aas, seguru no bele fiar iha situasaun oioin,” nia dehan tan.
Hafoin vizita fábrika, delegasaun kontinua ba Laboratóriu Guangxi ba Kareta Foun Enerjia, ne’ebé dedika ba peskiza no dezenvolvimentu teknolojia kareta elétriku no enerjia renovável.
Responsável laboratóriu esplika katak sentru peskiza ne’e lidera ona projetu nasional barak no hetan liuhusi patente 8.000, ho objetivu atu promove inovasaun iha indústria kareta foun enerjia.
Vizita remata ho oportunidade ba jornalista sira atu halo test drive no koko modelu kareta foun balu, inklui kareta elétriku, SUV no modelu off-road, atu hatene diretamente kona-ba teknolojia no desempeñu kareta sira-ne’e.
Atividade ida-ne’e sai parte hosi programa formasaun profisionál ba jornalista Timor-Leste iha Xina, ne’ebé organiza atu hasa’e koñesimentu kona-ba dezenvolvimentu indústria moderna, transformasaun dijitál no inovasaun teknolojia.
Jornalista: Azacsi Quintão
