DiliPost.com – Utiliza ro sidadaun estranjeiru nain 7 utrapasa teritoriu Timor Leste ho ilegalmente tula sigaru ho kuantidade karton 2.583 konsege ‘deteta’ husi Autoridade Marítima iha Munisipiu Baucau foin lalais ne’e.
Hafoin parte autoridade seguransa tasi iha Timor Leste halao kedas intervensaun liu husi patroliamentu rutina iha area refere tanba ró karga ho naran Famar Jaya Utama halo nia sirkulasaun iha area Seiçal, Munisípiu Baucau.
Ho nune’e Servisu Intelijénsia, Autoridade marítima no Polisia Nasiona Timor-Leste (PNTL) konsege kaptura sidadaun estranjeiru nain hitu ne’ebe iha ro laran inklui prende sasan ne’ebe sira tula.
Dadaun ne’e halao ona prosesa ba sidadaun estrajeiru nain lima husi Myanmar, rua husi Xina ne’ebé hela kleur iha Timor-Leste.
Tuir Porta Voz PNTL Superintendente Xefe Polísia João Belo dos Reis informa operasaun apreensaun Ro ilegal tasi parte Baukau nian, servisu intelijensia no servisu Maritima husi Forsa Defeza Timor-Leste (F-FDTL) no PNTL, monitoriza Moivimentu husi Ro Karga ida, halo nia serkulasaun iha tasi Timor, tanba suspeita tula sasan sira ne’ebé durante ne’e sirkula iha rai laran.
“Ita nia autoridade Maritima hamutuk ho Polisia halo intervensaun hapara Ro ne’e tanba nia hatun anklo iha tasi Baucau nia, ita halo intervensaun depois lori nia mai iha Dili, halo aprensaun sigaru hamutuk 2,583 Kartoon mai ho sigaru merek oi-oin Silver, Marlboro Timor-Leste, Marlboro mutin Indonézia, Dunhill, Manchester Sapphire Blue, Double Happiness,” hateten Portavoz PNTL liu husi konferénsia Imprensa Tersa-feira (28/07/2026) ne’e iha Kuartel Jeral PNTL Kaikoli Dili.
Aliende ne’e, nia afirma sigaru sira ne’e baibain sirkula iha merkadoria Dili laran, no mós iha Munisípiu sira tanba transporta ilegal mai husi tasi.
Ne’e duni, nia dehan operasaun ne’e demonstra kapasidade forsa seguransa no defesa atu atua iha forma koordenada atu intersepta rede kontrabandu ne’ebé tenta explorasa teritoriu Timor-Leste.
“Apreensaun sigaru ilegál liu 2.500 kartoon neebe reprezenta golpe signifikativu kontra komérsiu ilisitu ne’ebé prejudika saúde públika, ekonomia nasionál, no seguransa fronteira, tanba Primeiru la selu taxa, dalan tama husi ilegal no prejudika mós Saúde públika ita nia”, haktuir Superintendente Xefe Polísia João.
Portavoz PNTK ne’e esplika, Kontrabandu sigaru la’ós de’it krime fiskál. Maibé, atividade ida ne’ebé finansia rede krimi, korrompe instituisaun, prejudika saúde públika, no rai reseita Estadu ne’ebé bele investe iha edukasaun, saúde no infraestrutura.
Tan ne’e, nia lamenta tebes ho ro ki’ik ne’ebe sempre lori sigaru tama iha teritóriu hodi lansa depois Ro boot nee para iha tasi laran.
“Ita hatene sirkulasaun Sigaru ho modelu sira hanesan ohin ha’u temi ne’e barak mak sirkula iha ita nia Nasaun ne’ebé husi ne’e ita deskonfia katak Ro ne’e mós bai-bain operasaun iha Suai, Operasaun iha Manatuto no operasaun ida iha Dili sigaru ilegal sira ne’ebé tama husi tasi posibilidade iha ligasaun ho Ro ne’e,” tenik protavoz João.
Nia hatutan agora detekta ona ro no aprensaun ba ne’e tanba hamosu prejuizu boot ba estadu Timor-Leste.
“Agora dadauk prosesu identifikasaun la’o hela, hodi buska Roo nia aparelu tomak ita mós halo identifikasaun ba pesoal sira ne’ebé interligadu ba área ida ne’ebá mai ba sira ne’ebé hela iha Timor no sira ne’ebé hela iha estranjeiru no sira ne’ebé fasilita ita halo hela orientasaun para bele investiga ho klean hodi bele aprezenta ba iha Tribunal,”afirma João.
Portavos PNTL mos relata kona ba , Ro Farmajaya utama naran Indonézia mais uza Bandeira Kambodia, tan ne’e deskonfia sigaru sira ne’ebé iha Ro laran ne’e mai husi Nasaun Kambodia.
Nia mos haktuir ro no ema iha hotu ona prosesu identifikasaun. Tanba,dokumentus Ro nia ba utilizasaun iha teritóriu tasi nia iha prosesu investigasaun hela.
“ Ita mós sei koordena ho parte Maritima nia, parte RNAE, parte tasi nia oinsà mak bele hotu-hotu fo informasaun atu bele aprezenta ba iha Tribunal,” subliña João
PNTL konpromisu katak la tolera utilizasaun tasi teritorial no ba atividade kontrabandu no kriminalidade transnasional.
Jornalista : Octavina Costa
