DíliPost.com. ,Loron 09 Julli 2026 – Polísia Sientífika Investigasaun Kriminál (PCIC), hamutuk ho órgaun seguransa no instituisaun intelijénsia sira seluk, konsege kaptura sidadaun estranjeiru hamutuk 110, maioria husi Xina no Kambódia, iha operasaun ida iha Aldeia 20 de Setembru, Suku Bebonuk, Munisípiu Díli, tanba suspeita envolve iha atividade burla informatika no jogu online ilegál.
Operasaun ne’e hala’o iha oras tuku 20:30 kalan depois de investigasaun ne’ebé dura durante fulan ida. Durante operasaun, polísia aprende komputadór 88 unidades, laptop 13 unidades, telemóvel 23 unidades, Starlink 2 unidades, osan montante no ekipamentu eletróniku seluk ne’ebé suspeita uza ba atividade kriminál.
Investigadór Xefe Otávio da Costa Araújo hatete katak investigasaun ne’e hala’o durante fulan ida antes de autoridade sira halo asaun.
“Durante fulan ida nia laran ita halo identifikasaun ba sidadaun Xineza sira ne’ebé suspeita halo atividade jogu ilesitu ho burla informatika. Husi informasaun ne’e, ohin ita konsege infiltra tama iha fatin refere no kaer sira iha flagrante delitu,” hatete Otávio da Costa Araújo ba jornalista sira iha fatin refere.
Tuir nia, bainhira ekipa tama ba fatin refere, sidadaun Xineza balun tenta halai.
“Iha momentu operasaun, sidadaun Xineza nain 11 halai, maibé ekipa Eskuadra Kristu Rei konsege kaer fila fali. Agora total sidadaun estranjeiru ne’ebé ita asegura hamutuk ema 110,” dehan nia.
Investigadór Xefe ne’e mós hatete katak suspeitu sira hala’o atividade ne’e iha fatin ne’ebé seguransa maka’as, uza CCTV atu monitoriza movimentu ema no kontrola asesu ba edifísiu.
“ Sira nia atividade segredu loos. Ema la bele tama karik laiha ID Card espesífiku. Sira mós uza CCTV atu monitoriza ema tama no sai. Tanba ne’e mak ita uza tatika operasionál atu bele infiltra tama,” afirma nia.
Kona-ba situasaun imigrasaun, Otávio da Costa Araújo dehan maioria sidadaun estranjeiru sira la kaer hela sira nia pasaporte rasik.
“Maioria sira nia pasaporte iha ema seluk nia liman. Ema ne’ebé kaer pasaporte sira identifika ona, no iha tempu besik investigasaun sei buka atu kaer,” dehan nia.
Tuir nia katak suspeita rede ne’e hala’o burla informatika ba vítima sira iha nasaun oioin, la’ós deit ba sidadaun Timor-Leste.
Agora dadaun, ekipa investigasaun sei kontinua halo identifikasaun ba suspeitu sira, inventaria total osan no ekipamentu prende, no aprofunda investigasaun atu identifika ema seluk ne’ebé envolve iha rede kriminál ne’e.
“Agora kalan boot ona, ita asegura tiha ema no sasán hotu iha fatin seguru. Aban mak ita halo identifikasaun kompletu no relata montante osan no ekipamentu ne’ebé aprende,” hakotu Investigadór Xefe Otávio da Costa.
Jornalista : Dílipost.com
