DiliPost.com- Tribunál Judisial Primeira Instansia Dili, Sesta-feira (24/07) ne’e, liu hosi despaxu ikus ba kazu online Scam Call Center iha area Hera, deside aplika medida koasaun Prizaun Preventiva (PP) ba arguidu nain-11.
Arguidu sira nee Diresaun Servisu Investigasaun Kriminál (DSIK) asegura no detein iha area Hera Mota Kiik, Aldeia Halidolar, Suku Hera, Postu Administrativu Kristu Rei, iha loron Kuarta feira (22/07/2026) foin lalais nee.
Hafoin arguido sira lori ba aprezenta iha tribunal no Ministériu Publiku neebe reprezenta Prokurador Rafael Gusmão no Pedro Batista, provome sira ho Krime Jogu ilisitu previstu iha artigu 322, Asosiasaun Kriminoza previstu iha artigu 188, Burla informatika previstu iha artigu 268 no krime Brankeamentu kapitais previstu iha artigu 313 husi kodigu penal Timor-Leste.
Nune’e Tribunal liu husi Juiza Anapaula Fonseca halo tiha indentifikasaun ba arguidu nain-11 no ikus mai desize hodi aplika medida PP ba arguidu sira.
Tuir advogadu Privadu arguidu sira nian, João Serra katak, tribunal aplika medida PP ba arguidu sira maibé defeza la konkorda no sei halo rekursu.
“Ohin despaxu Tribunal Aplika Prizaun Preventiva ho razaun katak, tribunal iha indisiu sufisiente tanba nee mak aplika medida prizaun preventiva maibé
desizaun ida nee ami la konkorda tanba faktus no prova laiha ami sei halo Rekursu”, dehan advogadu privado João Serra ba jornalista iha Tribunal Kaikoli, Sesta ne’e.
Nune’e mos Advogadu Serra haree katak, desizaun ida nee sira sente politika iutoan, desizaun nee tenke sai juridika. Entaun fundamenta juridika ami la konkorda ami sei halo rekurau hasoru desizaun Tribunal Primeira Instanisa nia.
Iha alegasaun Ministériu Públiku liu hosi Prokurador titular, Rafael Gusmão no Pedro Baptista, husu Tribunál atu aplika medida Proibisaun Auzensia no medida Kausaun ho osan $5 mill ba kada arguidu.
No parte Defeza arguidu nain-11 Advogadu privadu, João Serra, la aseita alegasaun Ministériu Públiku nia ba medida Proibisaun Auzensia tanba evidensia la iha no la priense krime no karik Tribunál aplika medida Kausaun bele aplika medida Kausaun ho osan $1000 ba kada arguidu. Núne’e Defeza konsidera katak medida ne’ebé mak adekuadu no Justu liu mak medida koasaun Termu Identidade Rezidensia (TIR).
Iha prosesu Primeiru Interogatoriu ne’e, prezide hosi Juiz turnu, Ana Paula Fonseca, Ministériu Públiku reprezenta Prokurador titular, Rafael Gusmão no Pedro Baptista, Arguidu sira hetan asistensia legal hosi advogadu privadu, João Serra. (octa)
