DiliPost.com-Relasiona ho Krominozu ne’ebe sempre akontese, iha tempu kalan ne’ebe ninia fontes mai husi Foin Sa’e ne’ebe gosta la’o kalan bo’ot hodi ta’a ema no sona ema.
Tanba ne’e, Xefi Suku Caicoli Hipolito Marques husu Governu kria Lei ida ba Kriminozu sira ne’ebe ta’a ema no oho tenke ba hala’o to’os no natar iha Natarbora. Argumentu hirak ne’e, kestiona husi Xefi Suku Caicoli Hipolito Marques Sarmento ba Dili Post, iha kna’ar fatin Sede Suku, Kuarta-feira ne’e.
Buras
Hipolito informa, agora komesa mosu fali ona problema iha tempu kalan ne’ebe kriminozu sira la’o ho sasan kro’at. Hodi ta’a ema no sona ema arbiru. Halo situasaun la livre ba ema hotu nia ditetu atu la’o kalan.
Tanba, Kriminozu sira Polisia ka’er prosesu depois Tribunal haruka husik fali, hodi fo ikun naruk ba kiriminozu sira kontinua buras ba bebeik
“Ita hare’e agora prolema entre Arte Marsiais (AM), la iha ona, mosu fali Kriminozu sira ne’ebe mesak idade juven ne’ebe ita hare’e iha Media. Uainhira Polisia ka’er.
Hanesan foin daudaun Kriminozu sira ta’a juven ida iha Kampung Baru Comoro mai to’o iha Bebora ta’a tan karreta Grand Max. Hodi Polisia konsege kaptura ida no ida seluk hala’i ho motor ne’ebe ita hare’e mesak idade juven foin sa’e.
Maibe, sira nia asaun ne’ebe atu hakotu ema nia vida, maibe prosesu ita hare’e to’o Tribunal fo fali Termu Identidade Rezidensia (TIR), ba Kriminozu sira. Fo oportunidade ba Kriminozu sira seluk halo sira nia asaun no ita hafraku ita nia Lei rasik,”haktu’ir Hipolito.
Kastigu
Nia hatutan, loloos Governu halo Lei ida ba Kriminozu sira ho rigorozu, ou kastigu Kriminozu sira halo natar ho to’os iha Natarbora, tu’ir tinan ne’ebe Tribunal fo ba sira. Atu nune’e, Kriminozu sira ta’uk atu halo asaun Krimi.
“Ha’u nia hakarak ne’e, husu ba iha Governu se bele kria ba iha Parlamentu Nasional (PN) atu, produz Lei ne’e, ba de’it Krimininozu sira ne’ebe gosta hakanek ema no hakotu ema nia vida,”tenik Hipolito.
No limita ema hotu nia diretu atu la’o livre iha tempu loron no kalan, kria Lei ne’e, hatodan sira haruka sira ba halo to’os no natar iha Natarbora ne’eba hanesan kastigu tu’ir tempu Portugues.
Sira ne’ebe halo sala bo’ot oho ema no hakanek ema, tenke halo to’os no natar atu sira selu. Ho ida ne’e, ha-ta’uk atu halo tan Krimi, se ita la halo hanesan ne’e, ba futuru Kriminozu se’i aumenta buras. Ema la’o kalan la livre, halo atividades iha tempu kalan sente ta’uk no trauma nafatin.
Livre
Parte seluk Estudante Universidade Dili (UNDIL), Horacio Goncalves hateten, Lei ne’ebe iha konaba Krimi no Arma Brankas iha ona. Maibe, Kriminozu sira nafatin halo sira nia asaun hodi hakanek ema no hakotu ema nia vida. Tanba, Tribunal fo livre ba Kriminozu sira halo sira ikun naruk kontinua halo nafatin.
“Ha’u hare’e ita nia Lei la fraku, maibe iha prosesu ba Julgamentu mak ita la du’un kompriende. Tanbasa, ema sira ne’ebe halo Krimi hakarak hakotu ema nia vida no hakanek ema seluk.
Tribunal fo livre no haruka ema hirak ne’e kona TIR de’it ou ‘Wajib Lapor’ kada semana iha Polisia. Hare’e ba hanesan atu hanaruk fali Kriminozu sira nia hahalok kontinua halo Krimi.
Fo oportunidade ba grupu sira seluk atu halo Krimi, tanba sira hatene, karik Polisia ka’er sira. Depois prosesu to’o Tribunal fo livre ba sira hanesan fo nafatin oportunidade ba sira atu kontinua halo sira ninia asaun Krimi,”haforsa Horacio.
Nia hatutan, tu’ir loloos Governu kria Lei ida ne’ebe rigorozu ba Kriminozu sira, atu bele hamate Kriminozu sira nia kutun hodi la bele halo tan asaun ne’ebe hakotu ema nia vida.(al)
