DiliPost.com-Lia fu’an ne’e, hato’o ‘Koordinator Lapangan’ (KORLAP), hetan dudu to’o monu. Bainhira ho Profesor Kontradus (PK), sira koko atu ba hala’oi klarifikasaun ho Ministeriu Edukasaun (ME), iha loron Kuarta-feira (28/02), mais ou menus tuku 10 dader Otl. Informa KORLAP Igildo Alves Tilman ba Jornalista iha Jardin 5 de Maiu-Colmera.
Igildo haktu’ir, bainhira sira ba iha ME hodi hala’o konfirmasaun, tanbasa maluk balun simu ona re-Ingressu no sira la’e. Maibe, bainhira to’o iha portaun edifisiu, Seguransa sira taka dalan ba sira no sira mos la se’es hodi deskute malun atu bele tama.
Kanek
Bainhira Seguransa sira haruka,”ami muda ba parte sorin, ami hateten, ami la iha ligasaun ho ita bo’ot sira. Ami iha ligasaun ho ME. Ami mai ezije ami nia diretu tu’ir Lei.
Maski nune’e, sira nafatin dudu ami ho forsa maka’as, konsege ha’u monu ba rai hodi rezulta ha’u nia parte liman no hasan sorin kanek, mezmu hanesan ne’e, ami firme nafatin hodi ezije hanesan Komunikadu Inprensa (KI), ne’ebe realiza iha Munisipiu Ermera, sira koa’lia katak, se mak troka ha’u nia fatin nia kakorok kotu, i ha’u mos hanesan, se mak troka ha’u nia fatin mos nia kakorok kotu,”haktu’ir Igildo.
Asegura
Ho akontesimentu ne’e, PK 2023 liu husi porta-voz Agostinho Pinto lamenta ho aktus Polisia Nasional Timor-Leste (PNTL), Munisipiu Dili ne’ebe tu’ir loloos fo dalan ou asegura sira atu bele halo aproximasaun ba ME ba problema akontese entre parte rua, maibe halo fali asaun ne’ebe rezulta sira nia maluk balun hetan kanek.
Basá sira nia maluk balun ne’ebe asina kontratu hamutuk ho sira no naran publika iha Jornal da Republika hanesan mos sira, daudaun ne’e, simu tiha ona tomada de posse no sira fali la’e. Ida ne’e, hanesan diskriminasaun ne’ebe ME halo ba sira, nia kestiona.
Klarifikasaun
Ho situasaun sira hanesan ne’e, ohin,”ami atu ba halo Klarifikasaun iha ME. Maibe, ho PNTL ninia asaun halo ami nia kolega balun hetan kanek. Aleinde ne’e, Bandeira Republika Demokratiku Timor-Leste (RDTL), monu ba rai hodi kona ra’an, nune’e ami kondena tebes aktu ida ne’e, ami la’os Kriminozu,”Agostinho reforsa.
Hanesan ME rasik hateten, ema ne’ebe atu tama iha Ingresu Espesial nia tenke iha avaliasaun dezempeñu rejista iha Sistema Integradu Gestão Administração Pública (SIGAP), 2021-2022 nian.
Seráke Funsionariu balun husi Rekursus Umanus (RU), ME nian ne’ebe hala’o funsaun Administrasaun, iha diretu tama Ingressu Espesial.
Enkuantu, sira ne’ebe hala’o funsaun dosensia iha tinan barak nia laran la iha diretu ba avaliasaun dezempeñu no la iha mos diretu atu tama iha Ingressu Espesial.
Avaliasaun
Evidensia hatudu, sira ne’ebe tu’ur deit iha RU ne’ebá mos simu ona tomada de posse iha loron (30/11/2023). Entaun, Eskola ida ne’ebe halo Avaliasaun ba pessoal sira ne’ebe tu’ur de’it iha Ministeriu liu-liu RU ida ne’e, la loos.
Aleinde ne’e, sa’i vítima ba desizaun ME no sa’i vítima ba intimidasaun husi Seguransa PNTL. Tanba, ne’e sira husu ba Providoria Diretus Humanus no Justisa (PDHJ), atu investiga kle’an pessoal Seguransa sira ne’ebe assegura ME liu fali Professores.
Kolonealista
Hahalok hirak hanesan ne’e, hahalok Koloneialista sira nian ne’ebe hanoin de’it atu estraga povu kbi’it la’ek sira. Ho ida ne’e, PK sira se’i hato’o keixa ba PDHJ no Komandu Jeral (KomJer), atu investiga kle’an.
Mediador
Aleinde ne’e, PK Elizario Soares Barreto hatutan, se bainhira PNTL hakarak sa’i Mediador. Sira bele ou la’e hodi hato’o ba Orgaun kompetente sira atu bolu ME ho PK sira hodi klarifika problema ne’ebe,”ami iha, problema ne’e, la hotu tanba Lideransa sira rona de’it argumentu husi ME sein rona razaun husi PK sira. Tanba, iha Dekretu-Lei balun define,”katak nia.
Bainhira Dekretu-Lei ne’e, la iha ME mos se’i la fó Ingressu Espesial ba sira nia maluk iha tinan 2013-2023. Tanba, ne’e PK sira mos defende Lei ne’ebe refere, ne’e, dunik sira mos prontu atu ba hatan iha Parlamentu Nasional (PN), hodi esklarese lia loos durante ne’e, sira defende.(leya)
