DiliPost.com-Governo Reinu Unido (Britania),Afirma Nia Posisaun Katak Sei Estabelese Hikas Sira Nia Embaxada iha Timor Leste,hodi Hatudu Nafatin Komprimisiu Governu Britanika Nia Apoiu Tomak Ba Povu Timor Leste.
Iha Vizita Daruak Mai Timor Leste Ministra Reino Unido ba Indo Pasifico Anne Marie Trevelyan Hatete Timor Leste Nudar Nasaun Ne’ebe Importante tebes ba Reinu Unido.
“Ami senti kontenti mai iha fatin ida ne’e.
Ami kontenti atu mai fila fali iha rai furak ida ne’e. Ida ne’e mak ha’u nia vizita ba daruak iha Timor-Leste, nasaun ida ne’ebé importante liu ba Reinu Unidu. Wainhira ha’u vizita iha fulan Outubru liubá, ne’e mak vizita ministeriál dahuluk husi Reinu Unidu hafoin independénsia Timor-Leste nian. Tamba ne’e, ha’u kontenti lakeur tan atu halo vizita ba daruak.”Dehan Ministra Reino Unido ba Indo Pasifico Ne’e hafoin Hasoru Malu ho Primeiro Ministro Xanana Gusmao iha Palasio Governu Sesta Ne’e (1/3).
Ministra Reinu Unido Ne’e Imforma Durante iha diskusaun ne’ebé importante ho Primeiru Ministru Gusmão, iha ne’ebé ko’alia kona ba dalan atu haforsa kolaborasaun iha area oi-oin, inklui preparasaun Timor-Leste nian ba adezaun ASEAN, dezenvolvimentu ekonómiku Timor-Leste nian , saúde no nutrisaun.
Alende Ne’e Ministra Reino Unido ba Indo Pasifico Anne Marie Trevelyan mos Deklara Katak Governo Reino Unido Sei Loke Hikas Sira Nia Embaxada iha Dili, Nudar Parte Ida hodi hametiin Koperasaun liu Tan Koperasaun Rai rua nian.
“Ohin , ha’u mós kontenti atu anunsia intensaun Governu Reinu Unidu nian hodi loke fila fali ambaxada Reinu Unidu nian iha Díli , ne’e hatudu kompromisu Reinu Unidu nian ba povu Timor-Leste. Ita nu’udar belun ho relasaun ne’ebé forti. Ha’u orgullu katak servisu ami nian bele hadaek ba moris Timoroan tomak.” Dehan Ministra Reino Unido Ne’e.
Tuir Nia Katak absolutamente importante ba Reinu Unidu atu iha prezensa permanente iha Timor-Leste.
Ministra Reinu Unido Ne’e Hatete ho Reativasaun ambaxada británika permanente iha Díli sei marka faze importante ba relasaun bilateral ne’ebé forti liu entre nasaun rua ne’e hodi intensifika servisu hamutuk entre nasaun rua ne’ebé iha ona durante tinan rua ba kotuk ne’e, inklui vizita resente husi Prezidente Ramos-Horta ba Reinu Unidu iha Janeiru 2024.
“Ha’u iha esperansa boot atu Estadu Unidu Britániku estabelese sedu Embaixada Británika iha Díli hodi kontinua relasaun di’ak entre Reinu Unidu ho Timor-Leste, hodi suporta ba dezenvolvimentu ekonómiku no prosperidade ba Timor-oan tomak.” Deklara Governante Reino Unido Ne’e.
Iha Sorin Seluk Primeiro Ministro RDTL Kay Rala Xanana Gusmao Agradese ba Prezensa Ministra Anne- Marie Trevelayan hodi espresa ,la’ós de’it solidaridade mai iha Timor-Leste, maibé mós atu ka’olia kona-ba ninia servisu.
” Imi hotu hatene katak, Prezidente Repúblika, José Ramos-Horta ba too Reinu Unidu hasoru mós Ministra Anne-Marie Trevelyan, kontinua kedas enkontru ho Sekretáriu Estadu ba Asuntu Esternu, ba Commonwelt no Dezenvolvimentu Reinu-Unidu, David Cameron, iha edifísiu MNEK Reinu-Unidu hodi deskute asuntu sira ne’ebé sira sempre ajuda ita,” dehan PM Xanana akompaña ho Ministra Anne- Marie Trevelayan liu hosi konfrensia imprensa konjunta, iha salaun Gabinete Fronteira Maritima no Terrestre, Palasiu Governu, Dili.
Xefe Governu Xanana agradese tebes, tanba Governu Reinu Unidu hakarak hametin kooperasaun ho Timor-Leste no sei reativa sira nia Embaixada Britániku permanente iha Dili, Timor-Leste.
“Ha’u agradese tebes ba Reinu Unidu, tanba ita nia Timor-oan besik rihun-40 liu ba servisu iha Reinu Unidus no agradese teb-tebes sira ba ho pasaporte Portugés, mais Reinu Unidu simu sira hanesan Timor-oan. No hosi Ministériu Justisa mós sei haruka tekniku ida ba Reinu Unidu hodi ajuda Timoroan sira ne’ebé problema barak ho pasaporte liu prazu. Ne’ebé ha’u agradese tebes ba Ministra sira hakarak apoia ita iha área oin-oin, apoia ba ASEAN no apoia ba edukasaun, saúde, nutrisaun no seluk tan,” Xefe Governu agradese.
Xefe Governu IX Governu Konstitusionál konsidera ho reativasaun embaixada ne’e sei fasilita di’ak liután Timor-oan rihun ne’ebé ba buka esprensia servisu ho matenek oin-oin atu kontribui ba dezenvolvimentu nasaun doben Timor-Leste.
“Ita agradese mós sira hakarak loke mós embaixada permanente iha ida iha Timor-Leste no ne’e di’ak tebes,” PM orgullu.
Jornalista: Javelino Da Silva
