Dílipost.com ,Suai , 03 Setembru 2026 — Tribunal Judisiál Primeira Instánsia Suai (TJPIS), Kinta-feira ohin, liu husi despaxu ikus ba prosesu Primeiru Interogatóriu, deside aplika medida koasaun Prizaun Preventiva ba arguido na’in-haat ne’ebé deskonfia iha envolvimentu iha kazu deskonfia hamate Terezinha Cardoso, iha Aldeia Wetaba, Postu Administrativu Tilomar, Munisípiu Kovalima.
Arguido na’in-haat ne’e ho inisial SNI, DC, JC no AMA, kompostu husi membru SNI na’in-tolu no membru Unidade Patrulhamento Fronteira (UPF) na’in-ida.
Ministériu Públiku (MP), reprezenta husi Prokurador Renato Bere Nahac, promove ba arguido sira krime Omesídiu Simples, ne’ebé previstu iha Artigu 138 Kódigu Penál Timor-Leste (KPTL).
Hafoin rona tiha deklarasaun arguido sira no alegasaun husi MP no Defeza, Tribunal, liu husi Juiz Estajiáriu Spriano, deside aplika medida koasaun Prizaun Preventiva ba arguido na’in-haat.
Antes desizaun ne’e, MP liu husi Prokurador Renato Bere Nahac husu Tribunal atu aplika medida koasaun Prizaun Preventiva, ho konsiderasaun katak iha alegasaun kona-ba deskonfiansa arguido sira iha kazu ne’ebé halo Terezinha Cardoso lakon vida.
Maibé, parte Defeza la konkorda ho pedidu MP no husu Tribunal atu aplika medida Termu Identidade no Rezidénsia (TIR) ba arguido sira, hodi hein prosesu investigasaun kontinua.
Prosesu Primeiru Interogatóriu ne’e prezide husi Juiz Estajiáriu Spriano, ho Ministériu Públiku reprezenta husi Prokurador Renato Bere Nahac, enkuantu arguido sira hetan asisténsia legal husi Defensor Públiku Domingos dos Santos.
Tuir informasaun prosesu, antes ne’e, iha loron 31 Agostu 2026, Diresaun Servisu Investigasaun Kriminal (DSIK) hamutuk ho Diresaun Servisu Informasaun Polísia (DSIP) hala’o operasaun no busca iha residénsia arguido sira.
Operasaun no buska ne’e hala’o bazeia ba mandatu NúK 0016/20.CVSUI, tanba deskonfia arguido sira komete krime Omesídiu Simples ne’ebé relasiona ho kazu deskonfia hamate Terezinha Cardoso.
Jornalista : Octaviana Costa
