Dílipost.com, 19 Agustu 2026 – Primeiru-Ministru Timor-Leste, Kay Rala Xanana Gusmão, apela ba Estadu-Membru Comunidade Países de Língua Portuguesa (CPLP) atu hametin solidariedade, kooperasaun no asaun konkreta hodi enfrenta dezafiu sira ne’ebé afeta povu sira iha komunidade.
Apelu ne’e hato’o iha sesaun abertura Reuniaun Ordinária XXXI Konsellu Ministru CPLP, iha Salaun Nobre Ministériu Negósiu Estranjeiru no Kooperasaun (MNEC), Díli, ho tema “Konsolidasaun Estadu Direitu Demokrátiku no Dezafiu sira CPLP nian.”
Xefe Governu Xanana Gusmão fó boas-vindas ba membru governu husi Estadu-Membru CPLP sira no hato’o solidariedade ba povu Guiné-Bissau, ne’ebé enfrenta situasaun polítika sensível.
Nia reafirma Timor-Leste no CPLP nia kompromisu atu apoia diálogu, estabilidade institusionál no restaurasaun Estadu Direitu Demokrátiku iha Guiné-Bissau.
“Tenke selebra buat ne’ebé hamutuk ita, no konkista sira ne’ebé ita konsege atinji. Maibé ita mós tenke iha korajen atu reflete kona-ba frajilidade sira ne’ebé sei kontinua,”hato’o iha sesaun abertura Reuniaun Ordinária XXXI Konsellu Ministru CPLP, iha Salaun Nobre Ministériu Negósiu Estranjeiru no Kooperasaun (MNEC).
PM Xanana Gusmão hateten katak, depois de tinan 30 husi fundasaun CPLP, Estadu-Membru sira presiza sai liután ambisiozu atu konkretiza objetivu ne’ebé define hamutuk.
Nia subliña katak diferensa sosioekonómika, integrasaun ekonomia no komérsiu, utilizasaun rekursu finanseiru no umanu, no estabilidade instituisaun sei kontinua sai dezafiu ba CPLP.
“Liafuan sira labele troka asaun, no intensaun sira labele foti fatin realizasaun konkretu sira.”
Primeiru-Ministru mós propoin atu CPLP hametin mekanizmu akompañamentu no avaliasaun ba desizaun sira, inklui finansamentu ne’ebé konsistente atu apoiu projetu estruturante.
Nia hakarak kooperasaun CPLP fó atensaun ba seguransa ai-han, protesaun sosial, mudansa klimátika, protesaun tasi, reziliénsia hasoru instabilidade internasionál no seguransa sibernétika.
Xanana Gusmão mós destaka Timor-Leste nia membru iha ASEAN hanesan ponte estratéjika foun ba Estadu-Membru CPLP sira, liuliu iha área komérsiu, investimentu no dezenvolvimentu sosial no umanu.
“Ita iha voz kolektiva kona-ba dignidade umana, kona-ba dame, kona-ba justisa no kona-ba nesesidade atu proteje tasi no planeta. No ita tenke halo voz ne’e boot liután.”
Nia mós apela ba CPLP atu hato’o solidariedade ba povu sira ne’ebé sofre, inklui Povu Saharauí, no buka dalan atu hametin lian kolektiva CPLP iha nivel internasionál.
PM Xanana Gusmão destaka preparasaun ba Visaun Estratéjika CPLP 2027-2033, ne’ebé espera bele hametin koordenasaun polítiku-diplomátika no kooperasaun multisektoriál entre Estadu-Membru sira.
“Laiha dame, laiha dezenvolvimentu. Laiha harmonia klimátika, laiha futuru sustentável. No laiha planeta saudável, laiha uma komún ba ita hotu,” hakotu PM Xanana.
Jornalista : Dílipost.com
