Dílipost.com, 17 Agustu 2026 – Silvano Gomes, ne’ebé hetan tiru husi membru PNTL ho inisiál MG iha Irabin de Baixo, Uatucarbau, hakotu iis ona iha Hospital Nasionál Guido Valadares (HNGV), Segunda-feira (17/08), hale’u tuku 09:00, hafoin hetan tratamentu no halo operasaun tanba kanek grave ne’ebé hetan husi insidente tiru ne’ebé akontese iha loron Sábadu (15/08).
Familia Silvano Gomes husu atu prosesu judisiál ba kazu ne’e hala’o tuir lei, no husu autoridade kompetente sira halo investigasaun kompletu hodi determina responsabilidade ba akontesimentu ne’ebé halo nia mate.
Representante família, Elizário da Silva hateten katak família hakarak justisa no prosesu ne’e tenke tuir prosedimentu legal, ho tribunal mak iha kompeténsia atu determina parte ne’ebé sala ka loos.
“Sim, nia mate ona. Klaru ami família nia hakarak prosesu ne’e tenke tuir lei. Karik matebian mak sala, mos laiha buat ida, maibé prosesu tribunal mak tenke deside,” dehan Elizário ba jornalista sira iha HNGV, Segunda-feira.
Elizário hatutan autoridade polísia mós kontaktu família kona-ba autópsia hodi hetan evidénsia ne’ebé bele suporta investigasaun no prosesu judisiál.
Nia mós esplika katak, tuir informasaun hosi doutór sira, Silvano hetan kanek grave iha nia orgaun teen no presiza halo operasaun.
“ Doutór sira halo operasaun ba Silvano Gomes no informa katak nia teen hetan kuak tolu boot no kuak haat ki’ik, ne’ebé sira tesi hotu ona, maibé vítima nia kondisaun grave,” Elizário konta.
Insidente ne’e akontese iha Sábadu (15/08/2026), hale’u tuku 08:30 lokraik, iha Irabin de Baixo, Uatucarbau. Tuir informasaun família, Silvano hetan tiru husi membru PNTL ho inisiál MG, ne’ebé uza arma branka (pistola), alegadamente tanba Silvano kondús motór la uza kapasete.
Hafoin akontesimentu, Silvano hetan tratamentu médiku iha HNGV, maibé nia kondisaun grave to’o nia hakotu iis iha Segunda-feira.
Agora, mate-isin Silvano Gomes tau hela iha mortuáriu HNGV, ne’ebé akompaña husi família no ekipa Polísia Forénsika. Família hein prosedimentu hosi autoridade kompetente kona-ba autópsia hodi ajuda prosesu investigasaun.
To’o notísia ne’e públika, jornalista Dílipost.com tenta hetan hosu komentáriu bá porta-voz PNTL iha Komandu Jerál PNTL, kaikoli, maibé seidauk hetan resposta tanba, tuir informasaun ne’ebé hetan, presiza autorizasaun hosi Komandante Jerál PNTL.
Jornalista : Octaviana Costa
