DiliPost.com-Relasiona ho lista promosaun ba juiz sira dadaun ne’e iha ona meza Ministrú Justisa (MJ), Sergio da Costa Hornai, hodi bele hetan aprovasaun hafoin publika jornal da Repúblika.
“Prosesu ne’e depende ba pareser favorál husi Ministériu Finansas uluk. Karik Ministériu Finansas fó ona nia pareser favorál, se ha’u haree iha ha’u nia meza ha’u bele assina hodi halo publikasaun iha Jornal Repúbliku,” informa Ministru Sergio ba Jornalista hafoin partisipa reuniaun Konsellu Ministru, iha Palasiu Governu Kuarta-Feira(05/08/2026).
Governante hatutan, kona-ba ema nain hira mak hetan promosaun ne’e seidauk haree iha dadus ho lolos.
“Ha’u seidauk haree iha lista ne’e ema nain hira, wainhira ha’u hare mak ha’u sei fó hatene. Prosesu promosaun ne’e tuir mekanizmu ne’ebé iha relasaun ho Konsellu Superior da Majistratura Judisiál no hetan apoiu orsamentu husi Ministériu Finansas”, nia relata.
Antes ne’e Jurista Timor-oan, Alexandre Corte-Real, informa katak iha juiz hamutuk nain-8 mak sei hetan promosaun husi segunda klase ba primeira klase. Lista ne’e Inspetór sira submete ona ba Konsellu Majistradu.
“Agora lista ne’ebé Inspetor sira submete mai juiz nain-ualu mak hetan promosaun ba segunda klase ba primeira klase. Ba triseira klase ba iha segunda klase, ba nain hira ne’e ha’u seidauk haree,” tenik Alexandre.
Nia esplika dadaun ne’e lista ne’e haruka ona ba Governu liu husi Ministériu Justisa hodi hetan aprovasaun ba kuadru pesoal. Ida ne’e importante atu nune’e juiz sira bele hetan salariu tuir kategoria foun.
“Avaliasaun ne’e inspetor fó mai ona ba ami konsellu majistradu hodi hein kuadru. Agora ba tiha ona iha Ministéru Justisa atu bele aprova kuadru sira ne’e, hodi haree sira nia salariu. Bainhira mak sira hetan promosaun ne’e ita seidauk hatene tanba sei iha Ministériu Justisa,” subliña nia.
Tuir Alexandre, promosaun ne’e tanba barak husi juiz sira servisu ona liu tinan 10 maibé seidauk sa’e klase.
Aliende ne’e nia haktuir Juiz sira tinan 10 ona mós seidauk sa’e ba segunda klase entaun ida ne’e labele. Ida ne’e mak sai problema tanba ne’e ami konsellu majistradu mós kestiona maka’as.
“Inspetor sira tenke haree kuadru ne’e hodi haree servisu Juiz sira ne’ebé mak durante ne’e bom, hodi hasa’e sira nia salariu ba segunda klase no ba primeira klase,” nia konklui. (Júlia).
