Dílipost.com, 03 Setembru 2026 — Governo Dasia ofisialmente inaugura Ponte Manatuto no fó naran “Ponte Monsenhor Martinho da Costa Lopes”, nu’udar forma omenajen no rekonesementu ba servisu, sakrifísiu no kontribuisaun boot Monsenhor Martinho da Costa Lopes ba Igreja no Pátria.
Prezidente Repúblika, José Ramos-Horta, hatete katak Monsenhor Martinho da Costa Lopes mak figura importante ida ne’ebé fó kontribuisaun boot ba Igreja no mós ba luta povu Timor-Leste atu hetan liberdade no independénsia.
Tanba ne’e, Governo no Estadu Timor-Leste hili naran Monsenhor Martinho da Costa Lopes ba ponte ne’e, hodi perpetua nia legadu no mensajen unidade ba jerasaun sira tuirmai.
“ Uluk, Monsenhor Martinho da Costa Lopes hanesan ponte ida. Nia hakat mota, hakat fronteira, hakat loron monu no loron sa’e. Nia hanesan ponte ida ba ema hotu-hotu. Agora, Ponte Manatuto lori nia naran atu kontinua nia legadu ne’ebé nia husik mai ita, mak unidade. Monsenhor Martinho sempre iha relasaun di’ak ho ema hotu-hotu,” hateten Prezidente José Ramos-Horta iha inaugurasaun Ponte Monsenhor Martinho da Costa Lopes Manatuto ohin.
Prezidente Ramos-Horta mós hateten katak omenajen ne’e la’ós de’it atu fó naran ba infraestrutura, maibé atu rekonhese Monsenhor Martinho da Costa Lopes nu’udar herói, lutador, mestre no veteranu iha Igreja, ne’ebé fó kontribuisaun maka’as ba rai Timor-Leste durante luta ba liberdade.
“ Omenajen ba Dom Martinho, nia nu’udar herói ida, nu’udar lutador, mestre no veteranu ida iha Igreja, ne’ebé halo kontribuisaun maka’as ba rai ne’e atu hetan liberdade,” dehan PR.»
Iha eventu ne’ebá mós, Bispu Diocese Baucau, Dom Leandro Maria Alves, hateten katak Monsenhor Martinho da Costa Lopes bele konsidera nu’udar “ponte” ida ne’ebé lori lian povu Timor-Leste, liuliu sira ne’ebé sofre durante okupasaun, ba mundu internasionál.
” Monsenhor Martinho hanesan ponte ida ne’ebé lori Timoroan sira nia lian, liuliu Timoroan sira ne’ebé terus, hetan tortura no sira ne’ebé ema la rona sira nia lian. Tanba ne’e, nia sai hanesan ponte ida hodi lori Timoroan sira nia naran no lian ba mundu internasionál. Nia mós hanesan ponte ida ne’ebé liga ita nia povu ho Nai Maromak,” dehan Dom Leandro Maria Alves.
Enkuantu ne’e, Prezidente Autoridade Munisipál Manatuto, Luis Inacio Henrique Fernandes, hato’o agradese ba Governu no Estadu Timor-Leste tanba fó ona onra ba Monsenhor Martinho da Costa Lopes, ne’ebé konsidera nu’udar herói no figura importante ba povu Timor-Leste.
“ Hodi povu Manatuto nia naran, hau hakarak hato’o agradese ba Governu no Estadu ida ne’e tanba ho laran luak tomak fó onra ba ita nia herói, Monsenhor Martinho da Costa Lopes. Nia partisipasaun la’ós de’it nu’udar lideransa ba Uma Kreda, maibé nia mós fó kontribuisaun boot ba luta libertasaun ita nia rai,” dehan Luis Inacio Henrique Fernandes.
Inaugurasaun Ponte Monsenhor Martinho da Costa Lopes sai nu’udar símbolu rekonesementu ba legadu no kontribuisaun Monsenhor Martinho da Costa Lopes ba Igreja no Pátria.
Ponte ne’e mós lori mensajen kona-ba unidade, solidariedade no luta povu Timor-Leste, liuliu ba gerasaun foun atu kontinua valoriza istória no sakrifísiu ema sira ne’ebé kontribui ba liberdade no independénsia nasaun.
Jornalista : Moises Madeira
