Dílipost.com, Suai, 02 Setembru 2026 — Tribunal Judisiál Primeira Instánsia Suai (TJPIS), Kuarta-feira, realiza Primeiru Interogatóriu (PI) ba arguido na’in-haat ho inisiál SNI, DC, JC no AMA, relasiona ho kazu omesido ne’ebé mak hamate Terezinha Cardoso iha Aldeia Wetaba, Postu Administrativu Tilomar, Munisípiu Kovalima.
Iha prosesu Primeiru Interogatóriu ne’e, Tribunál halo identifikasaun no rona ona deklarasaun hosi arguido na’in-haat. Hafoin ne’e, Tribunál tama ba faze alegasaun hosi Ministériu Públiku no parte Defeza.
Iha alegasaun, Ministériu Públiku, reprezenta hosi Prokurador Renato Bere Nahac, husu ba Tribunál atu aplika medida koasaun prizaun preventiva ba arguido na’in-haat.
Maibé, parte Defeza la konkorda ho pedidu Ministériu Públiku. Defensor Públiku Domingos dos Santos husu ba Tribunál atu aplika medida Termu Identidade no Rezidénsia (TIR), hodi permite prosesu investigasaun kontinua.
“Iha alegasaun Ministériu Públiku nia husu Tribunal atu aplika medida koasaun Prizaun Preventiva ba arguidu na’in-haat ho inisiál SNI, DC, JC ho AMA. Parte Defeza nia husu Tribunal atu aplika medida TIR ne’ebé mak adekuadu hodi hein investigasaun klean husi parte kompetente, hodi bele apresenta provas sira ne’e iha julgamentu tuir mai iha prosesu komún normal,” dehan Defensor Públiku Domingos dos Santos ba jornalista sira iha Tribunal Suai, Kuarta-feira.
Hafoin rona alegasaun hosi parte rua, Tribunál deside adia desizaun ba loron Kinta-feira (03/09/2026), tuku 10:00 dadeer, hodi rona despaxu ikus kona-ba medida koasaun ba arguido na’in-haat.
Ministériu Públiku halo promosaun ba arguido na’in-haat ho alegasaun krime Omesídiu Simples, tuir Artigu 138 Kódigu Penál Timor-Leste.
Antes ne’e, Diresaun Servisu Investigasaun Kriminál (DSIK), hamutuk ho Diresaun Servisu Informasaun Polísia (DSIP), hala’o ona operasaun no busca iha rezidénsia arguido sira nian, nu’udar parte hosi prosesu investigasaun ba kazu ne’e.
Iha prosesu Primeiru Interogatóriu ne’e, Tribunál prezididu hosi Juíz Turnu, Ministériu Públiku reprezenta hosi Prokurador Renato Bere Nahac, no arguido na’in-haat hetan asisténsia legal hosi Defensor Públiku Domingos dos Santos.
Tuir kronolojia akontesimentu, kazu ne’e akontese iha 24 Juñu 2026, bainhira Terezinha Cardoso fila hosi nasaun viziña Indonézia no lakon iha mota masin iha Aldeia Wetaba, Postu Administrativu Tilomar, Munisípiu Kovalima.
Terezinha Cardoso deskonfia lakon tanba atake hosi lafaek, maibé kazu ne’e agora tama ona iha prosesu investigasaun kriminál no prosesu judisiál, ho arguido na’in-haat ne’ebé hasoru akuzasaun hosi Ministériu Públiku.
Iha prosesu Primeiru Interogatóriu, arguido na’in-haat lori mai iha Tribunal ho roupa babain no liman tau algema (borgol), akompaña hosi membru Komando Munisipál Suai no Unidade Patrulhamentu Fronteira (UPF).
Desizaun Tribunál kona-ba medida koasaun ba arguido na’in-haat sei rona iha Kinta-feira, 3 Setembru 2026, tuku 10:00 dadeer.
Jornalista : Octaviana Costa
