Dílipost.com, 03 Setembru 2026 — Misaun Korpu da Paz (Peace Corps) husi Governu Estadus Unidos Ámerika iha Timor-Leste sei foka liu ba área importante rua, mak edukasaun no dezenvolvimentu ekonómia komunitária, durante tinan rua sira nia servisu iha Timor-Leste.
Diretór Nasionál Korpu da Paz Estadus Unidos Ámerika iha Timor-Leste, ne’ebé mós Embaixadór Estadus Unidos Ámerika iha Timor-Leste, Jamie Fouss, hateten katak voluntáriu sira sei hahú servisu hamutuk ho parseiru Timoroan sira iha eskola no organizasaun sira ne’ebé servisu iha área dezenvolvimentu ekonómia komunitária.
“Misaun voluntáriu Korpu da Paz iha Timor-Leste ne’e foka liu ba área rua, hanesan edukasaun no dezenvolvimentu ekonómia komunitária,” dehan Jamie Fouss ba jornalista sira iha Hotel Timor, Kinta-feira ohin.
Nia hateten katak Korpu da Paz iha knaar importante hodi lori programa sira mai Timor-Leste, ho voluntáriu sira sei servisu hamutuk ho Governu, diretór eskola, organizasaun dezenvolvimentu, família uma-kain no líder komunitáriu sira.
Programa foun ne’e envolve voluntáriu na’in ualu (8), ne’ebé sei koloka iha munisípiu Aileu, Baucau, Manatuto, Manufahi no Atauro.
Durante sira-nia servisu, voluntáriu sira sei apoia hanorin lian Inglés iha eskola, no hala’o formasaun kona-ba dezenvolvimentu komunitáriu ba komunidade sira iha área sira ne’ebé voluntáriu sira sei koloka.
Jamie Fouss mós informa katak programa Korpu da Paz ne’e la’ós programa foun iha Timor-Leste, tanba ne’e ona programa ba dala sanulu-resin-haat (14).
Molok hahú sira-nia servisu, voluntáriu sira kompleta ona formasaun intensivu pré-servisu durante fulan tolu (3) iha Aileu. Formasaun ne’e inklui aprendizajen lian Tetun, saúde no seguransa, kultura Timor-Leste, no preparasaun téknika tuir área servisu ida-idak.
Durante períodu formasaun, voluntáriu sira mós hela hamutuk ho família uma-kain Timoroan sira. Ida-ne’e fó oportunidade ba voluntáriu sira atu pratika lian Tetun, aprende kona-ba moris loroloron iha Timor-Leste no hahú prosesu integrasaun ho komunidade.
Tuir informasaun husi Korpu da Paz, to’o agora voluntáriu hamutuk besik 300 ona servisu iha Timor-Leste, ho kontribuisaun iha área edukasaun no dezenvolvimentu komunitáriu.
Iha okaziaun ne’ebá, Programa Manajer Edukasaun, Mario Silva, hateten katak voluntáriu sira sei destaka liu-liu iha eskola públiku sira hodi apoia profesór sira iha hanorin lian Inglés ba estudante.
“Voluntáriu sira sei destaka ba eskola públiku, liuliu iha nível terséiru siklu, iha munisípiu Aileu, Manatuto, Atauro no Baucau,” informa Mario Silva.
Nia dehan katak voluntáriu sira sei foka ba área edukasaun no dezenvolvimentu ekonómia komunitária, ho objetivu atu kontribui ba dezenvolvimentu Timor-Leste durante sira-nia servisu tinan rua.
Mario Silva subliña katak voluntáriu sira sei la servisu mesak, maibé sei servisu hamutuk ho diretór eskola, autoridade lokál no komunidade sira, hodi garante programa ne’e responde ba nesesidade iha komunidade.
Jornalista : Octaviana Costa
