Dílipost.com, 18 Agustu 2026 – Planu atu loke koneksaun aérea entre Timor-Leste no Nusa Tenggara Timur (NTT), Indonézia, liuhusi rota Dili-Kupang seidauk tama iha faze operasaun ofisiál, tanba Aero Dili seidauk iha disponibilidade aeronave no slot voo ne’ebé sufisiente.
Diretor Ezekutivu Aero Dili, Lourenço de Oliveira, hateten katak Governador NTT halo kontaktu hodi diskute posibilidade loke rota Kupang-Dili no Dili-Kupang, inklui ligasaun ba Darwin, Austrália.
“Governador nia intensaun se bele karik nasaun tolu ne’e Aero Dili bele semo iha ne’ebá,” dehan Lourenço de Oliveira ba jornalista sira iha nia kna’ar fatin.
Lourenço hateten katak, atu loke rota foun ba Kupang, presiza planeamentu no preparasaun téknika, inklui disponibilidade aeronave no akordu relevante entre autoridade sira.
Nia mós hatudu katak kompanhia sei konsidera possibilidade ne’e iha futuru, liuliu bainhira Aero Dili konsege aumenta nia frota.
“La’ós dehan la semo, sei semo, maibé la’ós urjenti hanesan ne’e,” nia afirma.
Rota Kupang-Dili la’ós ideia foun. Iha Agustu 2022, Aero Dili halo ona voo tékniku eksperimentál ba Aeroportu El Tari, Kupang, ho aeronave Cessna 207.
Maski diskusaun entre Aero Dili no autoridade NTT akontese ona, seidauk iha data ofisiál ne’ebé konfirma ba komesa operasaun voo regular Dili-Kupang.
Jornalista: Dílipost.com
