– Governu Estadus Unidus Amerika (EUA), apoia ho konsistensia esforsu Governu Timor-Leste (TL) nian, adere ba Organizasaun Mundial Komersiu (OMK), iha aspeitu oi-oin. Inklui liu husi atividade importante United States Agengy for International Development (USAID) nian.
Partikularmente USAID ninia atividade Governasaun Komérsiu, ne’ebé ajuda Autóridade Aduaneira TL hodi moderniza nia sistema Komérsiu atu haktu’ir padraun Internasional sira. Apoiu husi USAID nian mos hametin transparénsia liu husi inisiativa sira hanesan Portal Komérsiu Aduaneiru.
Nasaun
TL iha dia (26/02/2024), EUA ho ksolok hato’o parabéins ba TL ba Nasaun ne’e, ninia adezaun ba OMK.
EUA apresia persisténsia TL nian no rekoñese susesu bo’ot sira ne’ebé halo ona atu kompleta rekerimentu sira no tempu ba negosiasaun ne’ebé badak durante tinan hitu (7) nia laran de’it.
“Estadus Unidus hatoo parabéns ba Timor-Leste nia adezaun ba OMK, marku importante ida atu nasaun ne’e sai hanesan parseiru global estratéjiku liu,” dehan Enkaregadu Negósiu Embaixada Estadus Unidus iha Dili, Marc Weinstock.
Adezaun TL nian ba OMK hanesan prova ba Nasaun ne’e, ninia dedikasaun no perseveransa. USAID hamri’ik hamutuk ho TL. Hodi apoiu Nasaun ne’e, nia jornada atu hetan future abertu, konektadu no prósperu. Diretur Interinu Misáun USAID, Mark White informa.
Governu EUA, liu husi USAID, se’i kontinua fo asisténsia téknika no kapasitasaun ba Autóridade Aduaneira depois adezaun atu halo alterasaun ba Kódigu Aduaneiru atu kumpri OMK ninia akordu fasilitasaun Komérsiu no estabelese eskritóriu inkéritu Nasionál.
Elaborasaun
USAID mós apoiu Elaborasaun Lei 4 tu’ir OMK ninia rekerimentu atu promove autonomia Telekomunikasaun TL ninian. Dezenvolvimentu Lejizlasaun Telekomunikasaun kritiku ba abilidade TL nian atu atrai investimentu relasionadu ho TIK no atu aseita ekspansaun servisu ne’ebé iha ligasaun ho TIK.
Kontribui
Aleinde ne’e, USAID liu husi USAID, Embaixada EUA ba TL kontribui ona osan hamutuk Millaun $ 92, entre 2021-2025, hodi hadi’a Ekonomia TL nian no promove Governasaun di’ak.
Dezde Restaurasaun Independénsia TL nian, USAID kontribui ona Millaun $ 3,23 resin hodi promove dezenvolvimentu inkluzivu pasífku atu Nasaun ne’e, prósperu, Saúdavel no autosufisiente.(**)
