DILI Post- Estudante husi Eskola CAFÉ de Dili, Zélia Marçal, sai segundu lugar iha konkursu “Escrita Criativa” ho tema “Futuro Sustentabilidade CPLP” ne’ebé organiza husi sekretariadu Comunidade dos Países da Língua Portuguesa (CPLP) iha Lisboa Portugal.
Kompetisaun konkursu “Escrita Criativa” ne’e, projetu pilotu ida-ne’ebé organiza husi Sekretariadu CPLP nian iha Lisboa Portugal ba eskola hamutuk 130 iha nível nasionál husi nasaun membru CPLP na’in-9.
Durante iha konkursu, iha estudante na’in 24 mak selesionadu hodi kontinua ba partisipa iha konkursu internasionál, iha ne’ebé rezultadu final hatudu, primeiru lugar husi Cabo Verde, segundu lugar Zélia Marçal husi Timor-Leste no terseiru lugar husi Portugal.
Prémiu ne’ebé nia simu maka osan hamutuk euro $ 900 no mós sertifikadu ne’ebé entrega direta husi Sekretáriu Ezekutivu CPLP, Zacarias Albano da Costa, iha ámbitu reuniaun ordinária Konsellu Ministru CPLP bá dala XXIX ne’ebé hala’o iha São Tomé e Príncipe, iha loron 19 Jullu tinan 2024.
Estudante Zélia Marçal hateten, sente kontente tebes, tanba reprezenta nasaun Timor-Leste, partisipa iha konkursu internasionál ne’e no sai segundu lugar.
“Sente orgullu tebes, tanba ha’u bele reprezenta ita-nia nasaun Timor-Leste, hatudu katak, ita Timor mós bele. Konkursu naran “Escrita Criativa” ho tema “Futuro Sustentabilidade CPLP”, membrus CPLP 9 paizes, maibé tenki iha redes eskolas amigas CPLP mak bele tuir. Kada nasaun ida iha rede eskola amigu CPLP,” hatete Zélia Marçal.
Estudante 10.° ano iha CAFÉ de Dili, tinan 16 husi Munisípiu Ermera ne’e promete, ho esperiénsia ne’ebé hetan liu husi konkursu refere, ba futuru sei dezenvolve di’ak liután, atu bele sai nu’udar eskritora ne’ebé di’ak ba Timor-Leste.
Zélia hatutan, partisipa iha kompetisaun refere la’ós husi eskola CAFÉ de Dili de’it, maibé, iha mós eskola seluk hanesan Eskola Sekundária 4 Setembru UNAMET Balidé.
Tanba ne’e, estudante Zélia Marçal husu ba maluk estudante sira seluk, atu eforsa aan nafatin aprende atu bele hetan mós oportunidade hodi partisipa iha kompetisaun internasionál sira.
Ministru Negósius Estranjeirus no Kooperasaun, Bendito dos Santos Freitas orgullu ho estudante Timoroan husi eskola CAFÉ de Dili, Zélia Marçal ne’ebé hetan segundu lugar iha kompetisaun hakerek, no ida-ne’e orgullu mós ba Timor-Leste.
“Bainhira nia fila, tenki hatene nia inan-aman, nia eskola iha ne’ebé, joven ne’ebé iha talentu, iha kriatividade, iha intelijénsia, ita atu bele fó apoiu nafatin para bele dezenvolve nia matenek, inrikese nia esperiénsia liu-liu ba parte akadémika ne’e nia bele sai futuru ida di’ak ba ita-nia rain,” hatete Ministru Bendito.
Nune’e mós Sekretáriu Ezekutivu CPLP, Zacarias Albano da Costa hateten, konkursu “Escrita Criativa” ne’e inisiativa husi Sekretariadu CPLP iha tinan ida-ne’e.
“Tinan ida-ne’e ami organiza duni konkursu de eskrita kriativa partisipa iha projetu pilotu ida-ne’e 130 eskolas, ne’e nível nasionál iha kada estadu-membru, depois alunus 24 mak hetan selesaun atu partisipa fali iha konkursu internasionál ida-ne’ebé faze final mak na’in-tolu, primeiru lugar husi Cabo Verde, Segundu husi Timor-Leste, Zélia Marçal no Terseiru lugar ba Portual,” hatete Zaracias Albano.
Eis Ministru Negósius Estranjeirus Timor-Leste ne’e hatutan, kompetisaun konkursu “Escrita Criativa” ne’e importante tebes, tanba, alende manán prémiu no sertifikadu, sira mós sai hanesan embaixadór ba CPLP hodi hato’o ba maluk joven sira seluk katak, futuru CPLP iha juventude sira.
“Jovens sira ohin tenki konsiénte katak, komunidade ida-ne’e iha benefísius bar-barak ba ita, tanba problema bar-barak ita hotu-hotu enfrenta, mais so fó liman ba malu, kooperasaun, interkámbiu ne’e mak ita hotu bele rezolve dezafius, problemas ne’ebé mosu iha ita ida-idak nian rain,” Sekretáriu Ezekutivu ne’e hakotu.
Jornalista:Javelino Da Silva
