DiliPost.com- Sidadaun ida hato’o pedidu provídensia kautelár ba Tribunál Judisiál Primeira Instánsia Dili (TJPID) hasoru Xefe Estadu Falintil Forza Deveza Timor Leste (F-FDTL) Maiór Jenerál Forsa Armada Tenente Jenerál Domingos Raul Falur Rate Laek liga ho kumpre no venda rai ida iha Hera, Postu Administrativu Kristu Rei Munisípiu Dili.
Nune’e Tribunál Judisiál Primeira Instánsia Dili hato’o sitasaun hodi sira Mandatariu Jenerál Falur ho prazu loron 10 tenke hato’o kontestasaun.
Nune’e, iha Sesta feira (24/7/2026) ne’e Mandatariu Tenente Jenerál Falur hato’o kontestasaun hodi kontesta sidadaun ne’e ba prosesu sivíl provídensia kautelár ne’e.
Mandatariu Celestinho Guterres ohin mai ho ekipa ida husi Kuartel Jeral F-FDTL seksaun justisa ho relasaun publika, hetan delegasaun husi Tenente Jeneral Falur Rate Laek iha kazu sivil ida, sidadaun rua maka hato’o reklamasaun (claim) katak hatama prosesu providensia kautelar ida hasoru Tenente Jeneral konaba rai ida iha Hera.
“Tuir loloos Tenente Jeneral ema inosente la hatene buat ida, tanba nia laos parte husi rai nee, la halo kompra no venda ruma konaba rai nee, ema seluk mak halo kompra e venda. Ho ida ne’e mandatariu hatama kontestasaun ida ba iha Tribunal”, Mandatariu Celestinho Guterres hateten ba Jornalista iha TJPID, sesta ne’e
Celestino esplika, sidadaun rua ne’e liu husi nia Advogadu, hatama prosesu kontra fali Tenente Falur, tanba ne’e mak bolu nia sai hanesan mandatariu ba Jeneral, halo kontestasaun loron 10 submete kontestasaun ba iha Tribunal.
“Ohin hanesan loron ikus ba prazu neebe iha, hodi hatama kontestasaun”, afirma Celestinho
Nia hatutan, hanesan mandatariu halo kontestasaun kona-ba faktus ne’ebé iha, lori mai iha Tribunál hodi rejistu ne’e iha kontestasaun mandatariu kontesta katak, Tenente Jeneral inosente, nia la hatene konaba kazu ne’e, nia mós la hola parte iha rai ne’e, laos nia maka rai nain.
“Nia (Jenerál) la iha relasaun ho rai ne’ebé disputa dadaun. Rai ne’e iha uluk tiha ona desizaun ida neebe tranzitu einjulgadu, momentu ne’ebá la iha ema ida maka halo rekursu, la iha ema ida maka halo reklamasaun”,tenik nia.
Celestino dehan, na’in ba rai ne’e iha Terras Propriedade no Diresaun Terras Propriedade halo levantamentu sukat tiha ona, no hein atu distribui sertifikadu.
Maibé, nia dehan ema seluk ida la hatene halo kompra e venda ba rai ne’e husu kotuk, mosu mai hatama fali prosesu Providensia Kautelar hasoru Tenente katak rai ne’e jeneral mós envolve hotu.
“Tuir faktus lolos rai ne’e nia nain halai tiha ona ba Indonézia, nia fo tiha poder ba nia oan nain rua, no nia oan nain rua fo tutan poder ba nia tiun ida. Sira reklama rai ne’e kontra señora ida foin lalais mate ona, no mos ema balu tan maibe mai too iha Tribunal absolve reu sira ne’e, no desizaun ne’e tun iha loron 26 fulan Fevereru tinan 2021”, subliña Celestinho.
Nia dehan, bainhira desizaun nee tun la iha ema ida mak halo rekursu, halo reklamasaun no intervensaun ruma, no prosesu nee lao husi 2021 to mai iha 2025 la iha ona reklamasaun, sira hetan ona titulu nain ba rai, halo levantamentu ba iha Terras Propriedade rejista hodi hetan sertifikadu, no sei iha Terras Propriedade nia kompeténsia.
“Ikus mai, iha ema balu mai hatama fali prosesu provídensia kautelár hasoru Tenente Falur Rate Laek, maibé nia la halo kompra venda iha neeba, nia oan feto maka hola rai liu husi senhora ida. Rai ne’ebé sira reklama ne’e petaka rua, no rai ne’ebé desizaun sai tiha ona maka parte sira reklama ne’e”, hakotu nia.
Jornalista : Octaviana Costa
