DiliPost.com- Membru Polisia Nasional Timor-Leste(PNTL) ne’ebe tiru nia fen kaben iha kapela igreja aimutin-nian sorin dadaun ne’e ‘sulan’ ona iha Sela.
Tuir Komandante PNTL Munisipíu Dili, Superiendente Xefe Polisia Orlando Gomes informa katak membru PNTL ne’ebe hanesan suspeitu tiru nia fen kazu ne’e akontese iha loron Domingo 12 Outobru maijumenus tuku 4:00 madrugada ne’ebe lokaliza iha area kapela igreja aimutin-nian sorin iha aldeia Sao Jose Suku Comoro, Munisipiu Dili.
” Hakarak informa kazu tentativa omesidiu ne’ebe involve ita-nia membru PNTL ho inisial JLO ne’ebe mak ho kondisaun lanu nia mai iha ninia rezidensia, nia haruka nia fen loke odamatan, maibe nia fen loke odamatan tarde, nune’e iha dezentendimentu oituan iha uma-laran, entaun ita-nia membru ne’e foti pistola karega, depois tiru iha nia fen ninia ain-los ruin tohar”, hateten Orlando ba jornalista sira iha Komando PNTL, Munisipíu Dili, Segunda feira (13/10/2025).
Nia mos haktuir iha akontesimentu ne’e familia husi vitima nian deside lori kedas vitima ba iha Hospital Nasional Guido Valadares(HNGV) hodi halo prosesu tratamentu ba vitima ne’e, tanba ran sai barak.
Nune’e, akontesimentu parte Polisia Munisipíu Dili esquarda Dom aleixu to’o kedas ba iha fatin refere, hodi desmarda kedas pistola ne’ebe ajente xefe polisia ne’e utiliza hodi tiru ninia fen.
Tanba ne’e, Komando Munisípiu Dili mos asegura no detein ona Ajente Xefe Polísia JLO ba iha sela esquadra Polísia Dom Aleixo hodi kompri oras 72 no tuir mai sei aprezenta ba iha Ministeriu Públiku.
“Iha momentu ne’eba ita desmarga kedas no ita-nia membru PNTL ne’e ita detein kedas iha sela detensaun 72 oras. No prosesu ida ne’e, ita-nia parte Diresaun Investigasaun Kriminal mak atende kona-ba ida ne’e no relatoriu hotu ita hato’o ona ba iha komando para atu bele foti medida prosesu kriminal ninia no mos sei foti medida prosesu displinar ninia mos”, haktuir komandante Munispiu Dili ne’e.
Tan ne’e, nia dehan sira mos sei foti medida displinar atu bele kontinua ba iha ministeriu publiku. Entaun medida displinar ninia, depois ita halo prosesu tribunal nian la’o, nomos prosesu displinar nia mos la’o, maibe ita sei enkaima ba iha nasional mak foti desizaun.
Nia hatutan medida sai mak Komando PNTL sei aplika, Orlando haktuir, Komando PNTL sei halo estuda no analiza klean ba sirkuntansia hosi kazu ne’ebe membru PNTL ne’e komete.
“Ita sei hare sirkuntansia hosi kazu ne’e, depois ita sei estuda klean mak foin bele foti desizaun nia atu kona-ba pena medida displinar nia saida”, nia informa.
Komandante Munispiu Dili ne’e mos relata, Komando PNTL lamenta ho aktu husi membru PNTL ne’e, tanba utiliza arma pistola la tuir ninia dalan ka regras ne’ebe mak estabele nanis ona.
“Institusaun PNTL ne’e estadu ninian atu halao servisu servi povu no nasaunnasaun, ne’ebe sasan estadu nian ita utiliza atu bele apoiu meius sira atu halo duni seguransa ho di’ak. Maibe kuandu utiliza sasan estadu nian la tuir lei ne’e ita sei prosesu rigorozu, tanba ne’e grave”, tenik Orlando.
Nia hateten, iha lei displinar PNTL nian bandu katak, bain-hira halao hela servisu laiha membru PNTL ida hemu tua lanu, maibe tenki oin mos para halo atendimentu seguransa ba komunidade sira ho diak no dignu.
Tanba ne’e, se kuandu membru PNTL sira utiliza sala arma, tenki prosesu ba oin. Nune’e arma ne’ebe membru PNTL ne’e utiliza momentu ne’eba dezamarda kedas.
“Ita mos foti ona desklarasaun husi vitima ne’e, nomos foti ona desklarasaun husi testamunha ninian nomos deklarasaun ba iha suspeitu ninian, para atu halo dadauk auto-prosesu aprezenta ba iha ministeriu publiku nian”, nia hakotu.
Jornalista : Azacsi Quintão.
