Dilipost.com- Membru Polísia Nasional Timor-Leste (PNTL) Korpu Seguransa Pesoal (CSP), Ajente Prinsipal José Lino Arcanjo Thomas, hetan sona Parte kakorok liman los nian iha Vila-Verde Polísia halo ona identifikasaun suspeitu nain hitu (7)
Komandante PNTL Munisipiu Dili, Superintendente Xefe Polisia Orlando Gomes haktuir Vitima membru Polísia CSP Ajente Prinsipal, José Lino Arcanjo Thomas, agora dadaun halo hela tratamentu intensivu iha Hospital Nasional Guido Valadares (HNGV), vitima ho kondisaun saúde grave.
“Ohin Kinta feira, loron 20 fulan Novembru tinan 2025 madrugada hale’u 04:00 Otl madrugada, akontesimentu iha Aldeia Lemorai suku Vill-Verde iha grupu balun asaltu ba malu depois konsege ita nia membru CSP ida hetan kanek,” informa Komandante Orlando, ba jornalista iha Komandu Munisípiu Díli, Kaikoli, Kinta feira ne’e.
Nia mos relata kona ba akontesimentu ne’e tanba iha nia sidadaun ida realiza festa despedida ida ne’ebé mak nia atu ba Portugal, tan ne’e nia despedida festa ne’e ba familia de’it.
“Maibé nia alin ba bolu tan ninia maun alin sira husi fatin seluk mai hamutuk. Entaun, depois sira konsumu alkohol iha ne’ebá hamosu konflitu akontese resulta ita nia membru CSP ida hetan kanek, ita nia membru Polísia ne’e agora halo tratamentu iha HNGV,” sublina Orlando.
Hafoin akontesimentu ne’e eskuadra Dom Aleixo no forsa rezerva halo atuasaun kedas hodi netraliza situasaun ne’ebé mak iha Aldeia Lemorai, Suku Villa-Verde.
“Ohin ita kontinua buka tuir suspeitu sira ita kaptura ona iha nain hitu 7 ne’e mak agora iha Eskuadra Vera Cruz atu halo identifikasaun hotu, depois ita sei buka tan suspeitu sira seluk para atu nune’e bele submete ba iha prosesu investigasaun”, Orlando Gomes hateten.
Nia hattutan Vitima kanek parte iha kakorok tanba ne’e mak evakua kedas ba HNGV para halo tratamentu kontinuasaun.
“Ita seidauk hatene iha prosesu investigasaun mak hatene uza saida mak to’o ita nia membru CSP husi Unidade Espesial Polísia ne’e hetan sona kanek, kona-ba ba kazu konfrontu depois investigasaun mak foin hatene membru CSP nia involvimentu ne’e iha ne’ebé, ” tenik komandante Munisipiu Dili ne’e.
Entertantu ho akontesemntu ne’e Autoridade seguransa halo kedas identifikasaun ba suspeitu sira ne’e depois prosesu investigasaun detekta se mak involve iha ne’ebá hato’o ba Ministériu Publiku (MP) hodi detein 72 horas kontinuasaun ba prosesu.(ercia)
