DiliPost.com- Sentru Voluntáriu Fundasaun Nippon ho Jica halao treinamentu ba estudante primária sira iha kapital Dili laran, atu hametin sira nia koñesimentu liliu iha area futeból.
Coordinator, Nippon Foundation Volunteer Center, Hiroki Sugiyama hateten, Sentru Voluntáriu Fundasaun Nippon sei hala’o workshop futeból ba estudante eskola primária sira iha Dili, hodi konvida eis-jogadór futeból profisionál Japaun Masao Kiba nu’udar konvidadu. Ida ne’e hanesan parte ida husi “Konekta ita-nia mehi Projetu Futeból 2025 iha Timor-Leste,” ne’ebé fó apoiu ba labarik sira iha Timor-Leste (TL).
” Projetu hahú iha fulan-Jullu 2024 bainhira Prezidente Fundasaun Nippon Yamawaki hasoru malu ho Prezidente Repúblika(PR) José Ramos-Horta, ne’ebé husu apoiu ba futeból. Eventu inaugural ne’e hala’o iha tinan kotuk, ho kooperasaun husi JICA no Liga Futeból Profisionál Japaun (J.League),ami fahe ona ekipamentu futeból hamutuk 446 ba eskola primária no organizasaun lokál sira iha Timor,” hateten Koordinator Nippon ba jornalista, iha kampu Real Madrid Manleu, Sabado (04/10).
Aliende ne’e, nia dehan tinan ne’e marka ba dala rua eventu ne’e realiza, no ba dala uluk, aula futeból sei hala’o iha Metinaro nune’e mós iha Dili. Klube J.League fó ona doasaun ekipamentu hamutuk 700, barak liu duké tinan kotuk, no sei fahe ba labarik lokál sira no sei uza iha klase futeból nian.
Eventu ne’e sei hala’o hosi voluntáriu estudante Japaun na’in 12 ne’ebé haruka hosi Sentru Voluntáriu Fundasaun Nippon,inklui Voluntáriu Koperasaun Ultramarinu JICA Japaun nian, ne’ebé sei halo interasaun ho labarik sira.
Sentru Voluntáriu Fundasaun Nippon harii iha 2010 hanesan Sentru Voluntáriu Estudante NPO Japaun nian, Sentru Voluntáriu Fundasaun Nippon hahú apoia atividade estudante nian. To’o fulan Marsu 2022, organizasaun haruka ona estudante liu 12,000 ba área sira ne’ebé afetadu husi rai-nakdoko bo’ot iha Japaun Leste.
Entertantu iha 2021, organizasaun ne’e muda nia naran ba Sentru Voluntáriu Fundasaun Nippon, no agora hala’o programa sira ne’ebé relasiona ho voluntáriu ne’ebé diriji ba jerasaun oioin la’os de’it ba estudante sira. Ba jogu Olímpiku no Paralímpiku Tókiu 2020, organizasaun ne’e envolve iha projetu sira formasaun no dezenvolvimentu voluntáriu nian.
Desde entaun, organizasaun kontinua haruka voluntáriu sira ba eventu sira ho eskala bo’ot hanesan 2023 WORLD BASEBALL CLASSICTM, haruka voluntáriu sira desastre nian ba área sira ne’ebé afetadu husi rai-nakdoko iha Península Noto 2024 no apoiu organizasaun voluntáriu sira.(Aza)
