Dílipost.com, 08 Agostu 2026 – Federasaun Futeból Timor-Leste (FFTL) reafirma nia konfiansa tomak ba lideransa Prezidente FIFA, Gianni Infantino, no konsidera katak nia vizaun no kompromisu kontribui boot ba dezenvolvimentu futeból iha mundu tomak, inklui Timor-Leste.
Dílipost.com asesu iha deklarasaun ofisiál, FFTL hateten katak futeból iha kbiit atu inspira esperansa, kria oportunidade no halibur ema husi nasaun oioin iha objetivu komún atu promove dezenvolvimentu no solidariedade. Tanba ne’e, FFTL manifesta nia apoiu ba lideransa Gianni Infantino ne’ebé konsidera instrumentál hodi hametin futeból mundiál no garante oportunidade ba Asosiasaun Membru FIFA hotu-hotu.
FFTL, programa dezenvolvimentu FIFA nian, liuliu FIFA Forward, halo ona impaktu pozitivu iha Timor-Leste liuhusi hadi’a infraestrutura futeból, hametin kapasidade institusionál federasaun nian no promove dezenvolvimentu tékniku futeból. Federasaun afirma katak investimentu sira-ne’e fó ona rezultadu signifikativu ba kreximentu sustentável futeból nasional.
FFTL mos salienta katak maski Timor-Leste seidauk sai poténsia futeból ida, nasaun sei kontinua fiar ba kbiit esperansa no oportunidade. Federasaun konsidera katak vizaun Gianni Infantino kona-ba inkluzaun, solidariedade no oportunidade ba nasaun hotu-hotu inspira tebes movimentu futeból iha Timor-Leste.
Deklarasaun ne’e mos hateten katak konfiansa FFTL bazeia ba rezultadu konkrétu husi kooperasaun ho FIFA durante tinan hirak liubá. Progresu sira-ne’e, tuir federasaun, reforsa konviksaun katak lideransa Gianni Infantino fó ona kontribuisaun importante ba harii futeból mundiál ida-ne’ebé forte liu, unidu liu no inkluzivu liu.
Iha deklarasaun, Federasaun Futeból Timor-Leste reafirma nia kompromisu atu kontinua servisu hamutuk ho FIFA no família futeból mundiál hodi promove dezenvolvimentu sustentável futeból ba benefísiu Asosiasaun Membru FIFA hotu-hotu.
Jornalista : azacsi Quintao
