Dílipost.com, 29 Agostu 2026 — Prezidente Repúblika Demokrátika Timor-Leste, José Ramos-Horta, realiza enkontru bilateral ho Prezidente Repúblika Indonézia, Prabowo Subianto, iha Palásiu Prezidensiál, Jakarta, Sexta-feira (28/08/2026), hodi hametin relasaun bilateral no kooperasaun entre nasaun rua.
Enkontru bilateral entre xefe Estadu rua ne’e konsidera hanesan oportunidade importante ida atu kontinua haforsa konfiansa, diálogu no kooperasaun entre Timor-Leste no Indonézia, liuliu iha asuntu estratéjiku sira ne’ebé importante ba interese nasaun rua.
Enkontru ne’e mós hala’o hafoin agenda enkontru antes ne’ebé hetan adiamentu dala barak, no iha oportunidade ida-ne’e Prezidente Ramos-Horta lori delegasaun ne’ebé inklui figura internasionál sira, inklui laureadu Nobel no peritu sira hosi área oioin.
Laureadu Nobel sira ne’e mai husi área páz, siénsia, kimika no espesializasaun sira seluk. Sira partisipa iha enkontru no semináriu kona-ba siénsia ne’ebé hala’o iha Dili, husi loron 24 to’o 26 Agostu 2026, antes akompaña Prezidente Ramos-Horta ba Indonézia.
Prezensia figura internasionál sira, liuliu laureadu Nobel ba páz sira, konsidera hanesan parte hosi esforsu diplomátiku atu promove diálogu, kompriensaun mútua no dame entre povu no nasaun rua.
Diplomásia ida-ne’e mós haree hanesan oportunidade atu haforsa relasaun istórika no amizade entre Timor-Leste no Indonézia, ne’ebé sai baze importante ba estabilidade no dezenvolvimentu iha rejiaun.
Iha enkontru bilateral ne’e, Prezidente Ramos-Horta mós hato’o konvite direta ba Prezidente Prabowo Subianto atu vizita Timor-Leste. Konvite ne’e simu ona hosi Prezidente Indonézia, no vizita Prabowo ba Timor-Leste espera atu realiza iha tempu badak.
“Hametin relasaun di’ak ho Indonézia, ho baze iha konfiansa, kooperasaun no diálogu, sei sai elementu importante ida ba estabilidade no prosperidade komún iha futuru.”
Relasaun bilateral ne’ebé forte no bazeia ba konfiansa bele sai plataforma importante atu kontinua avansa negosiasaun kona-ba asuntu estratéjiku entre nasaun rua, inklui delimitasaun no rezolusaun fronteira marítima Timor-Leste no Indonézia.
Asuntu fronteira marítima sai hanesan ida hosi kestaun importante ne’ebé presiza kontinua liuhusi diálogu diplomátiku, negosiasaun konstrutiva no respeitu ba direitu internasionál.
Ba Timor-Leste, diplomásia ne’ebé independente, konstrutiva no bazeia ba respeitu mútua la’ós de’it importante atu hametin integridade nasaun iha arena internasionál, maibé mós bele hafasil buka solusaun ba asuntu bilateral sira ne’ebé seidauk rezolve.
“Diplomásia ida ne’ebé konstrutiva, independente no bazeia ba respeitu mútua bele hafasil buka solusaun ba asuntu sira ne’ebé seidauk rezolve entre país rua.”
Prezensa Prezidente Ramos-Horta iha Jakarta, hamutuk ho figura internasionál sira, mós hatudu esforsu Timor-Leste atu uza diplomásia no diálogu hanesan instrumentu atu promove dame, kooperasaun no kompriensaun mútua.
Enkontru Ramos-Horta no Prabowo, tanba ne’e, la’ós de’it importante ba relasaun bilateral iha tempu agora, maibé mós bele sai pasu ida atu hametin parseria estratéjika entre Timor-Leste no Indonézia iha futuru.
Ho konfiansa ne’ebé kontinua hametin, diálogu regular no kompromisu hosi nasaun rua, Timor-Leste no Indonézia bele kontinua buka solusaun ba asuntu komún sira no kria benefísiu ba povu rua.
Jornalista : Dílipost.com
