DiliPost.com- Primeiru-Ministru (PM), Kay Rala Xanana Gusmão, enkoraza traballadór Timoroan sira ne’ebé daudaun servisu iha Nhulunbuy, Norte Territóriu Austrália, atu kontinua aumenta koñesimentu no kapasidade, hodi bele lori esperiénsia ne’ebé hetan bainhira fila bele dezenvolve rai Timor-Leste.
Enkorazamentu ne’e hato’o bainhira PM Xanana hasoru malu no han kalan-hamutuk ho traballadór Timoroan na’in-28, ne’ebé servisu iha otél no restaurante sira iha área Gove, Nhulunbuy, Domingu (02/08).
PM Xanana rekoñese katak traballadór sira sei hasoru difikuldade no dezafiu durante servisu iha rai-liur, maibé importante atu kontinua aprende no aproveita oportunidade ne’ebé iha.
“Ha’u hatene imi hasoru difikuldade, dezafiu, maibé ha’u fiar katak ho imi-nia jerente ka empregadór sira ne’ebé di’ak tebes bá imi, buat hotu sai di’ak. Espera katak realidade ne’ebé ita sei hasoru iha ita-nia rain, hatudu bá ema seluk katak problema maka atu asegura ita ida-idak bele halo buat ruma bá ita-nia povu no bá ita-nia rain. Hakuak bo’ot ida bá imi hotu,” PM Xanana enkoraza.
PM Xanana mós hato’o apresiasaun bá kompañia sira ne’ebé fó oportunidade servisu bá traballadór Timoroan no durante ne’e haree di’ak sira iha fatin servisu.
Asistente Sekretáriu PALM iha Canberra, Rachel Jolly, mós apresia esforsu traballadór Timoroan sira ne’ebé servisu maka’as hodi atinje mehi bá família no nasaun.
Tuir Jolly, Sustrália komprometidu atu kontinua apoia traballadór Timoroan sira, liuhosi kapasitasaun iha área lian, atu aumenta sira-nia kapasidade no benefisia oportunidade servisu iha Austrália.
Reprezentante traballadór iha Walkabout Lodge, Natalina Ximenes Guterres, hato’o agradese bá Governu Timor-Leste no Austrália tanba fó oportunidade bá Timoroan sira atu servisu iha Austrália.
“Ho oportunidade ne’e, ami bele kontribui bá indústria lokál no estabelese ligasaun ho ema sira hosi rai barak iha mundu,” Natalina hateten.
Traballadór Timor-Leste ne’ebé haruka hosi Governu liuhosi Sekretária Estadu Formasaun Profisionál no Empregu (SEFOPE), hamutuk na’in-28 servisu iha Nhulunbuy, iha kompañia tolu.
Iha Walkabout Lodge, traballadór na’in-11 servisu iha área kitchen, housekeeping, waitress no yard/gardening.
Sira ne’e kompostu hosi mane na’in-rua no feto na’in-sia.
Iha Care’s NT, traballadór na’in-14, kompostu hosi feto na’in-sia no mane na’in-lima, servisu iha área oioin.
Enkuantu iha East Arnhem Real Estate, traballadór na’in-tolu servisu iha área general cleaning, yard, housekeeping no building furniture.
Durante servisu iha Nhulunbuy, traballadór Timoroan sira mós forma banda ho naran East Timor Boys, ne’ebé hametin no promove naran Timor-Leste liuhosi múzika.
Banda ne’e mós hamutuk ho banda Aboriginal no Blues Society sira iha atividade kulturál sira.
Enkontru no han kalan-hamutuk iha Walkabout Restaurant, Gove, Nhulunbuy, partisipa mós hosi na’in bá kompañia tolu ne’ebé fó servisu bá traballadór Timoroan sira, inklui Care’s NT, Walkabout no East Arnhem Real Estate.
PM Xanana iha sorumutuk ne’e akompaña hosi Embaixadora Timor-Leste iha Austrália, Inés de Almeida; Embaixadora Austrália iha Timor-Leste, Caitlin Wilson; Adidu Traballu SEFOPE, Rofino dos Reis Lopes; Country Liaison Officer (CLO) Timor-Leste; no Xefe Gabinete PM, Elizabeth Exposto. (Média-GPM)
